Uzun müddətdi ''Qalatasaray''ın transfer siyahısında olan Florian Qrillitş ilə bağlı maraqlı olaylar yaşanmaqdadı.

"Football-plus.az" xəbər verir ki, Almaniya mətbuatının iddiasına görə avstriyalı yarımmüdafiəçi ''Qalatasaray''ın ardından ''Brayton''la da anlaşa bilməyib. Özü də İngiltərə klubu futbolçunun xarakteri ilə bağlı probleminin olmasından şübhələndiyi üçün danışıqları dayandırıb. Əslində problem Qrillitşin özündən yox, onun meneceri kimi çalışan atasından qaynaqlanır. Bir qədər kobud dildə desək, atanın heç cür gözü doymur. Bu problem ''Qalatasaray''la danışıqlar zamanı da özünü biruzə vermişdi. Atasının daim yeni şərtlər irəli sürməsi və daha çox pul tələb etməsi üzündən İstanbul nəhəngi bu oyunçudan vaz keçməli olmuşdu.

Bu arada məlum olub ki, ''Brayton''la da anlaşa bilmədikdən sonra Qrillitş atası ilə işləməkdən imtina edərək özünə yeni menecer axtarmağa başlayıb Hadisələrin bu cür axarından sonra Almaniya mətbuatı ''Qrillitş üçün transfer dönəmi indi start götürür'' ifadəsini yazıb. ''Qalatasaray'' 2 həftə öncə azad agent statusunda olan bu futbolçuya 1,5 milyon avro imza parası və 1,5 milyon avro illik məvacib təklif etmişdi. Avstriya yığmasının da şərəfini qoruyan Qrillitş ötən mövsüm ''Hoffenhaym''da 18 rəsmi oyunda meydana çıxmışdı.