Avropa klublarının diqqət mərkəzində saxladığı Yunusun ''Cim-Bom''la müqaviləsinin müddəti gələn yay bitəcək.

Football-plus.az xəbər verir ki, İstanbul nəhəngi həm gənc oyunçunu motivasiyalandırmaq üçün onun maaşını artıracaq, həm də pulsuz əldən verməmək üçün ona ikiillik yeni müqavilə təklif edəcək. Akgün hazırda ''Qalatasaray''da illik 900 min lirəlik məvacibi ilə ən az qazanan futbolçulardan biridi. Rəhbərlik onun maaşını təxminən 13 dəfə artıraraq 12 milyon lirəyə çatdırmağı planlaşdırır. Amma bunun müqabilində Yunus 2025-ci ilə qədər nəzərdə tutulan yeni müqaviləyə imza atmalıdı.

Bu ildən etibarən Türkiyə yığmasına da dəvət almağa başlayan solaxay futbolçu ötən mövsüm ''Adana Dəmirspor''un heyətində 38 rəsmi oyunda 9 qol, 17 məhsuldar ötürməlik performans sərgiləmişdi. Ötən yay onun dəyəri cəmi 2 milyon avro idisə, hazırda ''transfermarkt''ın versiyasına görə Akgünün dəyəri 7,5 milyon avrodu.