“Məni diqqətdə saxladığınız üçün hər birinizə təşəkkür edirəm. Əvvəlcə bütün türk dünyasına başsağlığı verirəm. Bu, bizim üçün böyük faciədi. Öz ağrılarım yaddan çıxıb. Allaha and olsun ki, hazırda bütün gün Türkiyədəki qardaş-bacılarımızı, balalarımızı düşünürəm. Sosial şəbəkələrdə gözüm xoş xəbərlər axtarır. Əfsuslar olsun ki, pis məlumatlar daha çoxdu... Xəstəxanadan evə buraxılandan sonra bir müddət müalicəm davam etdi. Tikişlər açılıb. İrəliləyişin olduğunu deyə bilərəm. Çünki ayaqlarım topuqdan tərpənir. Kənar dəstəyin – yüyürgəcin köməyi ilə evin içində olsa da, hərəkət edə bilirəm. Amma onurğa sümüyündə olan sınıqlar, ayağımda, topuğumda olan xəsarətlər hələ ki yeriməyə imkan vermir. Düzdü, çox çalışıram, idman edirəm. Amma təəssüf ki, hələ gücüm tam çatmır. Onurğa sütünumda, ayağımdakı xəsarətlər yerimdə dayanmağa imkan vermir. Amma ümidim böyükdü. Anlayıram ki, ağır əməliyyatdan çıxmışam. Düzdü, ikinci əməliyyatla bağlı bu yaxınlarda söhbət gedirdi. Amma hələ ki gözləyirəm. İstəmirəm ki, yenə əməliyyat olum. Ağrılar qalsa, amma addım ata bilsəm, yəqin ki, imtina edəcəm. Düşünürəm ki, bu imtahanı keçə biləcəm”.

“Hər kəsdən çox razıyam. Çox adam maraqlanır. Yazırlar, gəlirlər. Mən də imkanım olduğu müddətdə bu barədə sosial şəbəkələrdə insanlara məlumat verirəm. Bu məqam mənə psixoloji baxımdan müsbət təsir edir. Bir az təskinlik tapıram. Düşünürəm ki, yaddan çıxmıram, insanlar məni unutmur. Onların dəstəyi indiki məqamda mənim kimi insana çox vacibdi. Normal həyatını davam etdirən adamın fikirləri tam başqa olur. Yatağa məhkum olan şəxsi isə fərqli düşüncələr boğur. Bu səbəbdən də Türkiyədəki zəlzələdən sonra dağıntılar altından çıxanları çox yaxşı başa düşürəm. Hamısının müsahibələrinə baxıram. Hansı hissləri keçirirlər, nə əziyyətlər çəkirlər - başa düşürəm. Ümid edirəm ki, hər şey daha yaxşı olacaq. Hazırda mənimlə AFFA-dakılar müntəzəm əlaqə saxlayır. Hakimlər Komitəsindən maraqlanırlar. Onlar da gəlirlər. AFFA, PFL rəhbərliyi də xəstəxanadan çıxandan sonra da əlaqə saxlayıb. Federasiyanın baş katibi Sərxan Hacıyev bir neçə dəfə şəxsən özü əlaqə saxladı. Nəyəsə ehtiyacımın olub-olmadığını soruşdu. Sona qədər yanımda olduqlarını söylədi. Nəyəsə ehtiyacım olarsa, müraciət edə biləcəyimi dedi. Yəni hamı öz üzərinə düşən və düşməyən işi görür. Buna görə də onlara minnətdaram. “Liv Bona Dea Hospital”ın əməkdaşları da çox sağ olsunlar. Mənim üçün çox əziyyət çəkdilər. Həqiqətən də çox ağır əməliyyatdan çıxdım. Onların sayəsində indi özümü yaxşı hiss edirəm. Düzdü, belə bir əməliyyatdan sonra 10 günə ayağa durub yerimək çətindi. İnşallah, bu yaxınlarda gəzəcəm. Daxilimdə bir hiss deyir ki, bacaracaqsan. Özümdə bu gücü tapacam. Yenidən normal həyata qayıtmaq istəyirəm. Ola bilər ki, fiziki işlər görə bilməyim. Bəlkə də qaçmayacam, futbol oynamayacam. Amma bu vəziyyətim dərs deməyə, hakim-inspektorluq etməyimə heç bir maneə törətməyəcək. Hakim-inspektorlar tez-tez dərslər keçir. Həmin seminarları videoformatda mənə də göndərirlər. Sualları tez cavablayaraq onlara qaytarıram. Özümü formada saxlayıram. Evdə bu istiqamətdə kitablar oxuyuram. Misli premyer-liqasının oyunlarını, digər futbol matçlarını izləyirəm. Hakimlərlə tez-tez əlaqə saxlayır, onların fikirlərini soruşuram. Nələrisə müzakirə edirik. Sağ olsunlar ki, məni bu işin içində saxlayırlar. Əsas məqsəd iş prinsipinin yaddan çıxmamasıdı. Bu şeylərdə mənə kömək edirlər”.

“Dostlarım tez-tez yanıma gəlir. Deyirlər ki, narkozda ola-ola, öz-özümə danışmışam ki, ərzaqları çatdırın. İnsanların ac olduqlarını bildirmişəm. Bu artıq mənim ruhuma hopub. Bunu etməsəm, dayana bilmərəm. Çox istədim ki, xeyriyyəçilikdən kənarlaşım. Çünki həqiqətən adamın əsəb sistemini pozur. Xəstə, ac uşaqları, insanları görmək adamı özündən çıxarır. Onları əməliyyata aparmaq, yeməkləri üçün ərzaq tapmaq insana çox pis təsir edir. İndi özüm getmirəm. Amma işləri idarə edə bilirəm. Evdəkilər bazarlıq edir, qablaşdırır və çatdırırlar. Ailəmə də təşəkkürümü bildirirəm. Ümumiyyətlə, bu işdə mənə dəstək olan hamıya minnətdaram. Sağ olsunlar ki, bu məqamda belə məni tək buraxmırlar. Mənəvi dəstək belə mənə psixoloji cəhətdən yaxşı təsir edir. İnşallah, ayağa qalxım, özüm bu işləri davam etdirəcəm. Təbii ki, Allah istəsə. Həyat davam edir. İnşallah, arzu edirəm ki, gələn dəfə ayaqüstə, gəzərək sizə müsahibə və ya açıqlama verim. Açığı, sağalmadan danışmaq istəmirdim. Hörmət etdiyim “Futbol+” kollektivi mənimlə maraqlanırsa, onları cavabsız qoymaq olmazdı”.