“Böyük beşlik” ölkələrindən fərqli Türkiyədə qış “transfer pəncərəsi” yanvarın 31-də yox, fevralın 8-də bağlanacaq. Bu üzdən Türkiyə klubları transferlərini davam etdirir.

“Qalatasaray” son günləri çox faydalı keçirdi. İstanbul nəhəngi həm önəmli bir transfer həyata keçirərək müdafiə xəttini gücləndirdi, həm də özünə lazım olmayan iki legionerlə vidalaşdı.

Öncə transfer haqda danışaq. “Cim-Bom” son illərdə dəfələrlə Türkiyə nəhənglərinin gündəminə gələn Kaan Ayhanı heyətinə qatdı.

Footbal-plus.az-ın məlumatına görə, bu futbolçunun həm uşaqlıqdan “Qalatasaray” azarkeşi olması, həm də şərəfini qoruduğu “Sassuolo”da baş məşqçi ilə problem yaşaması “sarı-qırmızılar”in işini asanlaşdırdı. “Qalatasaray” ötən yay da “Sassuolo”ya rəsmi təklif irəli sürmüşdü. Həmin vaxt təklifi geri çevirən italiyalılar bu dəfə də Türkiyə yığmasının üzvünü satmaq istəmirdilər. Amma Kaanın özünün ayrılmaq istəyi həlledici oldu. Nəticədə “Qalatasaray” 400 min avro ödəməklə 28 yaşlı müdafiəçini mövsümün sonuna qədər icarəyə götürdü. Kaan bu müddətdə 600 min avro qazanacaq. Müqaviləyə məcburi transfer maddəsi qoyulmasa da, “Qalatasaray” rəhbərliyi “Sassuolo”nu razı almaq üçün müqaviləyə 2 şərt saldırdı. Bunlardan biri komandanın ÇL-ə vəsiqə qazanması, digəri isə Kaanın mövsümün sonuna qədər ən azı 8 superliqa matçında forma geyməsidi. Demək olar ki, bu iki şərtdən biri mütləq həyata keçəcək. Belədə “Qalatasaray” mövsümün sonunda qarşı tərəfə daha 2,8 milyon avro ödəyərək Ayhanla üçillik müqavilə imzalayacaq. Onun hətta maaşı da bəllidi: 1-ci il 1 milyon avro, 2-ci il 1,25 milyon avro, 3-cü il 1,35 milyon avro. Maraqlıdı ki, Kaan İtaliyada bundan daha çox - 1,5 milyon avro qazanırdı.

Qısaca qeyd edək ki, müdafiənin isənilən mövqeyində oynamağı bacaran universal futbolçu Almaniyada doğulub və uzun illər bu ölkədə çıxış edib. “Şalke-04”, “Ayntraxt” və “Fortuna”da oynayan Kaan 2020-dən bəri “Sassuolo”da çıxış edirdi. Onun artıq həftəsonu “Trabzonspor”la oyunda debüt edəcəyi gözlənilir. Bundan başqa, “Qalatasaray” “Sassuolo”da çıxış edən Türkiyə yığmasının digər üzvü Mərt Müldürü də heyətinə qatmağa çalışır.


“Benfika” və “Selta”nın “Qalatasaray”a xeyri

Ayrılan oyunçulara gəlincə, Haris Seferoviç icarə əsasında “Selta”ya, Patrik van Anholt isə eyni qaydada PSV-yə yollanıb. Əslində İstanbulda qalmaq istəyən Seferoviçin “Kasımpaşa”ya keçəcəyi gözlənilirdi. “Cim-Bom” hətta ona yarım mövsümlük maaşı olan 1,15 milyon avronun yarısını ödəməyə də hazır idi. Amma isveçrəli forvardın müqavilə ilə məxsus olduğu “Benfika” “Selta” ilə anlaşınca “Qalatasaray” bu pulu ödəməkdən qurtuldu. Van Anholtun 900 min avroluq maaşını isə PSV ödəyəcək. Beləcə “Qalatasaray” həm heyətdə 2 legioner üçün yer boşaltdı, həm də 2 milyon 50 min avroluq maaş yükündən qurtuldu. Onu da bildirək ki, “Aslan” “Fiorentina”da çıxış edən sabiq “Real”lı Luka Yoviçlə də danışıqlar aparır.