“Krasnodar”ın “Qarabağ”ın ulduzu Kadi Borgesin transferinə görə ödəyəcəyi 4,8 milyon avronun hamısının ağdamlılara çatmayacağını bilirsiz.

Bu məbləğin 5 faizi onu 2019-cu ilə qədər yetişdirən “Koritiba”nın hesabına köçürüləcək. Aşağıdakı yazını oxumaqla həm FİFA-nın müəyyənləşdirdiyi bu ödəniş sisteminin təfərrüatını öyrənəcək, həm də “Çelsi”nin yeni transferi ətrafında yaranan mürəkkəb durumdan xəbərdar olacaqsız.

“Çelsi”nin növbəti transferi Norveç “Molde”sinin 20 yaşlı hücumçusu David Fofanadı. Bu, londonluların qışda həyata keçirdiyi 3-cü transferdi. Əvvəlcə “Monako”dan yarımmüdafiəçi Benua Badyaşili aldılar, bugünlərdə isə “Vasko de Qama”nın 18 yaşlı istedadı Andrey Santosla anlaşdılar.

Fofananı dekabrın ortalarında razı salıblar. Kot-d'İvuardan olan müdafiəçiyə görə 12 milyon avro ödənilib, onunla sonradan 1 il də uzadılmaq imkanı nəzərdə tutulmaqla 2029-cu ilə qədər müqavilə imzalanıb. Potterin dediyinə görə, Davidi əvvəlcə icarəyə verə bilərlər: “Fofana məzuniyyətdə olub, odu ki, forma yığmaq üçün vaxta ehtiyac duyur. Ardından biz onun karyerasının gələcəyi baxımından qərar verməliyik”.

Hərçənd burda çətin məqam var. “Mançester Siti” ilə kubok oyununda futbolçunun adı iştirak ərizəsinə salınsa da, hətta 2-ci hissədə meydana çıxsa da, “Mirror” yazır ki, onun tezliklə Norveçə qayıtması mümkündü.

Nə baş verir?
Xaosun səbəbkarı gənc oyunçunun doğma klubudu, yəni Kot-d'İvuar təmsilçisi “Abican Siti”. Bu klub iddia edir ki, 2016-cı ildə Davidin anası akademiyaya onun sonrakı transferlərindən pul qazanmağa imkan verən sənədi imzalamayıb. Klub Fofananın “Molde”yə keçidini qeyri-qanuni sayır, hərçənd həmin vaxt hücumçu artıq Amadu Diallo-Cekanu futbol akademiyasında məşğul olardı.

Məhz həmin sənədin yoxluğu üzündən “Abican Siti” Fofananı yetişdirməyə görə ona çatası pulu tələb edə bilmir. FİFA-nın mövcud və Kadinin “Krasnodar”a keçidində də tətbiq olunan reqlamentinə görə, satıcı klub oyunçunun başqa komandaya keçidi zamanı məbləğin 5 faizini onunla 12-23 yaş arasında məşğul olan məktəbə verir. 12-15 yaş aralığında yetişdirmənin hər ilinə görə 0,25, 16-23 yaş aralığında isə 0,5 faiz nəzərdə tutulur. “Abican Siti” israr edir ki, “Molde”nin londonlularla sövdələşmədən əldə etdiyi məbləğin 1,5 faizi ona çatmalıdı. Kot-d'İvuar klubu həmin 180 min avroya görə FİFA-dan transferin ləğvini tələb edir. Klub prezidenti Marko Taddeinin FİFA-ya yazdığı məktubda deyilir:

“Klubumuz hesab edir ki, “Molde” ilə “Çelsi” arasındakı müqavilə qeyri-qanunidi. Buna görə də FİFA-ya “Çelsi”nin işinə müdaxilə etməyi və bizlə “Molde” arasında bütün mübahisələr həll olunana qədər transferi dayandırmağı təklif edirik. Bu, işin araşdırılmasına yardım edərdi”.

David hələ ki mövzu ilə bağlı açıqlama verməyib və karyera yüksəlişinə nail olduğuna görə sevinir.
Fofana Droqbanın fanatıdı, Holann səviyyəsində qollar vurur

Cəmi iki il əvvəl Avropaya təşrif buyuran Davidi Norveç liqasında qolları sıraladığına görə artıq çoxları Erlinq Holann ilə müqayisə edir. O, ötən mövsüm 24 oyunda 18 məhsuldar hərəkətlə yadda qalıb. “The Athletic”in Norveç çempionatı üzrə eksperti Stiv Vissin dəyərləndirməsi: “O, çoxlu qol vurur, ancaq cinahda oynaması daha yaxşı olardı, belədə Salah üslubunda cərimə meydançasına daxil olardı. Davidin çoxlu özəllikləri var. Mən onu möhtəşəm bitirici saymıram. Kot-d'İvuardan olduğuna görə onu Didye Droqba ilə müqayisə edirlər. Ancaq Fofana qətiyyən həmvətəninə oxşamır. Texnikalı və möhkəm oğlandı, perspektivi isə məşqçidən və onun seçimlərindən asılıdı”.
• Fofananın kumiri məhz Droqbadı: “Həmişə Didyeyə heyranlıq duymuşam. Lap uşaqlıqdan “Çelsi” sevimli klubum olub. Droqba orda oynayırdı – başqa seçimim ola bilməzdi. Məhz bu komandaya keçmək ən böyük arzum idi”.
• Fofananın ən üstün keyfiyyəti sürətdi. David bu mövsüm mərkəzdə daha böyük sərbəstlik qazanıb və tez-tez müdafiəçilərin arxasında görünüb. “Molde”nin çalışdırıcısı Erlinq Mue hesab edir ki, Fofana anadangəlmə hiyləgərdi. Müdafiəçilər, sadəcə, ona qarşı necə hərəkət etməli olduqlarını anlamırlar.
• Davidin karyerasının ən parlaq anı 2021-in fevralında Avropa Liqasında “Hoffenhaym”a qarşı oyundu. Onda 64-cü dəqiqədə meydana çıxan hücumçu cəmi 10 dəqiqə sonra həlledici qolu vurmaqla norveçliləri 1/8 finala çıxarmışdı. Düzdü, “Molde” həmin mərhələdə İspaniya “Qranada”sı ilə bacarmadı.

Fofananın “Çelsi” forması geymək arzusu artıq çin olub. Doğrudanmı, anasının 2016-da imzalamadığı hansısa sənədə görə onun arzusunu gözündə qoyacaqlar?