Joao Felişin “Atletiko”dan “Çelsi”yə keçidi ilə bağlı bütün detallar razılaşdırılıb.

Football-plus.az xəbər verir ki, dünən yayılan xəbərə görə, klublar artıq 23 yaşlı hücumçunun 11 milyon avroya icarəyə götürülməsi ilə bağlı danışıqları bitirib. “Çelsi” icarə dövründə portuqaliyalının bütün maaş ödənişlərini öz boynuna götürür. Bu məbləğ 5,3 milyon funt (6 milyon avro) təşkil edəcək.
Feliş Madriddən ayrılmaq ərəfəsində “Atletiko” ilə müqavilə müddətini 2027-ci ilə qədər uzadıb. O, dünən Londona uçaraq tibbi müayinədən keçib və zəruri sənədləri imzalayıb.

Portuqaliyalı ulduz “Atletiko”nun heyətində cari mövsümdə bütün turnirlərdə keçirdiyi 20 oyunda 5 qol vurub, 3 məhsuldar ötürmə verib. Həmçinin yığmanın heyətində DÇ-2022-də 3 oyuna çıxıb, 1 qol və 2 məhsuldar ötürmə ilə yadda qalıb.

“Çelsi” cari mövsümdə yeni oyunçuların transferinə artıq 355,49 milyon avro xərcləməklə bütün klubları qabaqlayır. 2-ci yerdə MY (240,32 milyon), 3-cü yerdə “Vest Hem” (182 milyon) qərarlaşıb. “Çelsi” qış “transfer pəncərəsi”ndə də hamıdan çox – 73,5 milyon avro xərcləyib. Felişə qədər Badyaşil üçün 38, Santos üçün 12,5, Fofana üçün 12 milyon avro ödənilib.