“Molde”nin yeniyetmə futbolçusu Datro Fofana “Çelsi”yə keçib. London klubu onun transferi ilə kifayətlənmək istəmir.

19 yaşlı hücumçunun keçidi “Çelsi”yə təxminən 12 milyon avroya başa gəlib. Fofana yeni klubuna 2023-cü il yanvarın 1-də qoşulacaq. Onun icarəyə verilib-verilməyəcəyi, ya da komandada qalıb start heyətində şans qazanmaq üçün mübarizə aparacağı hələlik məlum deyil. Qeyd edək ki, Datro Norveç çempionatında “Molde”in çempion olmasında 24 oyun keçirməklə, 15 qol vurub 3 məhsuldar ötürmə etməklə rol oynayıb.

“Çelsi” “Monako”nun müdafiəçisi Benua Badyaşilin transferi üzrə danışıqları da yekunlaşdırmağa yaxındı. London klubunun bu transfer üçün təxminən 35-40 milyon avro təzminat ödəyəcəyi xəbər verilir. Artıq futbolçu ilə müqavilənin şərtləri razılaşdırılıb.

Böyük Britaniya mənbələri London klubunun “Benfika”nın argentinalı yarımmüdafiəçisi Entso Fernandeslə razılığa gəldiyini də xəbər verib. “Çelsi” artıq Lissabon klubu ilə danışıqlara başlayıb. Yenicə dünya çempionu olan 21 yaşlı Fernandes bu mövsüm “Benfika”nın heyətində 24 oyuna çıxıb, 3 qol vurub və 5 məhsuldar ötürmə edib.