Markaonun daha bir qalmaqalının üstü açıldı
Türkiyənin U-21 yığmasının baş məşqçisi, eyni zamanda Türkiyə Futbol Federasiyasında “altyapı” direktoru kimi çalışan Tolunay Kafkas təxminən 2 il öncə baş verən qalmaqallı hadisənin təfərrüatını açıqlayıb.
Football-plus.az xəbər verir ki, bu yay “Qalatasaray”dan “Sevilya”ya transfer olunan və aqresivliyi ilə diqqəti çəkən Markao ötən mövsümün 1-ci turunda “Girəsunspor”la səfər oyununda komanda yoldaşı Kərəm Aktürkoğluna yumruq atdığı üçün qırmızı vərəqə almışdı. Amma braziliyalı yarımmüdafiəçi buna bənzər daha bir qalmaqalım iştirakçısı olmuşdu.
Sadəcə, həmin vaxt bu hadisə ört-basdır edilmişdi. 2020-ci ilin oktyabrın 9-da yığmaların oyunu ilə bağlı yaranmış fasilə zamanı Türkiyənin U-21 komandası “Qalatasaray”la hazırlıq matçı keçirmişdi. “Qalatasaray”ın bazasında baş tutan, jurnalistlərin içəri buraxılmadığı və çəkilişə icazə verilmədiyi oyun yenə də Markaonun Xəlil Dərvişoğluna yumruq atması üzündən yarımçıq dayandırılmışdı! O vaxt “Qalatasaray” belə bir hadisənin yaşanmasını təkzib etmiş, matçın yarımçıq dayandırılması isə dumanla əlaqələndirilmişdi. Bu hadisədən bir neçə ay sonra Xəlil “Cim-Bom”a gələrək Markao ilə komanda yoldaşı olmuşdu. TGRT kanalında yayınlanan bir verilişin qonağı olan Kafkas o vaxt yaşananlar barədə danışıb. Kafkasın sözlərindən belə başa düşmək olar ki, həmin hadisə gözləniləndən də ciddi olub və məsələ yalnız Terimin xaişi sayəsində ört-basdır edilib:
“Həmin vaxt güclü bir rəqiblə qarşılaşmaq istəyirdik. “Beşiktaş”ın başında duran Sərgən Yalçın, “Fənərbaxça”nı çalışdıran Erol Bulut, eləcə də Fatih Terimlə söhbət etdim. Onlardan yalnız Terimi yoxlama matçı keçirmək təklifini qəbul etdi. Mən gördüyümü söyləyən insanam. Markaonun Xəlilə zərbə vurmağa çalışdığını görüb hadisə tərəfə qaçdım. Terim oyunu yuxarıdan izləyirdi və ordan göstəriş verdi ki, bu məsələyə qarışmayım. Mən də sakitcə razılaşdım. Çünki Şenol Günəşlə Fatih Terimin məndəki yeri ayrıdı. İkisinin də evində olmuşam. Məni məhz onlar məşqçi edib. Məni “Qalatasaray”a dəvət edən Terim olub. Belə şeylərdə çox vəfalı insanam. Oyun yarımçıq dayandırıldı. Avtobusa minəndə Ümit Davala mənə yaxınlaşaraq Terimin mənimlə danışmaq istədiyini dedi. Terimin sözündən belə çıxdı ki, belə şeylər olur və uzatmağa dəyməz. Xəlil ilə də bu barədə danışdım. Sonra özü də komanda yoldaşlarına “belə şeylər olur, məsələni elə burda da bağlayaq bitsin” dedi. Etiraf edim ki, 10-15 il əvvəlki çılğınlığım olsaydı, orda çox böyük olaylar yaşanacaqdı”.
Digər xəbərlər
