Bəli, 4 il həsrətində olduğumuz dünya çempionatı başlayıb.

Özü də dünyanı bürüyən koronavirus pandemiyasından sonra bu futbol bayramının əhəmiyyəti daha da artıb. Çünki çinlilərin dünyaya “bəxş etdiyi” bu dəhşətli virus və onun gətirdiyi qadağalar gözümüzü əməlli-başlı qorxutmuşdu. Sərt karantinin tələbləri, “evdə qal” çağırışları, bütün kütləvi tədbirlərin ləğv edilməsi, küçəyə ağzımızda maska çıxmağımız ömrümüzü yeyib-bitirirdi. Qorxurduq ki, bundan sonra adət etdiyimiz günləri bir də yaşaya bilməyəcəyik. Həmçinin dolu tribunalar qarşısında keçirilən böyük futbol turnirlərinə həsrət qalmağa məcbur olacağıq. Şükürlər olsun ki, qorxduğumuz başımıza gəlmədi, yaman günün ömrü az oldu. İnsanlıq, immunitet sistemimiz bu dəfə virusa qalib gəlməyi bacardı. Düzdü, bəzi qadağalar hələ də qalmaqdadı, bizi rahatlaşmağa qoymur. Bununla belə, həsrətində olduğumuz normal həyatın əksər gözəlliklərini geri qaytara bilmişik. Həmçinin futbol bərpa olunub, azarkeşlər tribunalara qayıdıb.

Amma budəfəki dünya çempionatının bəzi qeyri-adilikləri var. Bunlardan biri də mundialın adət etdiyimiz vaxtda, yəni yay aylarında keçirilməməsidi. Noyabrın sonuncu ongünlüyündə start götürən çempionat dekabrın ortalarına qədər davam edəcək. Bu isə o deməkdi ki, dünyanın bir çox aparıcı futbol ölkəsində daxili çempionatlara ara verilir. Çünki aparıcı klubların əksər futbolçuları milli komandalarının şərəfini qorumaq üçün Qətərə yollanıb. Onların yoxluğunda çempionatlar davam edə bilməzdi. Digər yandan azarkeşlərin də bütün diqqəti Qətərə yönəlib. Fərqi yoxdu, kimin ölkəsi dünya çempionatında iştirak edir, ya yox. Millisi dünya kubokuna vəsiqə qazanmayanlar belə könül verməyə, azarkeşlik etməyə komanda tapır. Tapmayanlar da gözəl futbola azarkeşlik edir, hər gün bir komandanın qələbəsi üçün həyəcan keçirir. Azərbaycan klublarında top qovan futbolçulardan heç biri Qətərə yollanan yığmaların şərəfini qorumur. Deməli, bizim klublarımıza dünya kubokunun hansısa bir təsiri yoxdu, heyətdəkilərin hamısı yerindədi. Elə PFL də bunu nəzərə alıb, Misli premyer-liqasına fasilə verməyi lazım bilməyib. Həftəortası Azərbaycan kubokunun 1/8 final oyunları keçirildi. Bazar günü isə premyer-liqanın 15-ci turunun oyunları start götürəcək.

Bilirəm ki, azarkeşlər və futbolçular üçün də xeyli çətindi. Dünya futbolunun ürəyi Qətərdə döyünərkən, milyonların diqqəti uzaq Ərəbistan səhralarını bəzəyən yaraşıqlı stadionlarda keçirilən bir-birindən maraqlı oyunlara yönəlmişkən Azərbaycan çempionatına köklənmək, yarıboş tribunalar önündə keçirilən qarşılaşmalara baxmaq heç də asan deyil. Amma “başa gələn çəkilir” deyiblər. Bir halda ki, Azərbaycan futboluna fasilə verilməyib, bizimkilər davam edir, futbolçuların da, azarkeşlərin də bu qərara əməl etməsi vacibdi. O cümlədən də biz üzərimizə düşəni etməli, öz futbolumuzdan yazmalıyıq. Necə deyərlər, dünya çempionatı gəldi-gedərdi, bizə qalan Azərbaycan futbolu olacaq.

Bəs qarşıdakı turda bizi nə gözləyir, hansı oyunlar daha çox diqqəti çəkəcək? 14-cü tur onunla əlamətdar oldu ki, “Qarabağ”ın qələbə seriyası dayandı, “köhlən atlar” Masazırda büdrədi. Düzdü, “Sabah” “Qarabağ”ı məğlub etməyi bacarmadı. Deməli, Ağdam təmsilçisi hədəfinə doğru məğlubiyyətsiz irəliləyir. Amma indiki məqamda “Qarabağ”a uduzmamağın özü də bir hünərdi. Bunu isə bacaran “Sabah” oldu. Murad Musayevin komandasının bacardığını bu mövsüm başqa heç bir Azərbaycan klubu edə bilməmişdi. Bununla Masazır təmsilçisi həm də onu isbatladı ki, “Qarabağ”ın izləyicisi statusuna layiq komandadı. Aradakı xal fərqi 5-ə bərabərdi. İlk baxışdan o qədər də böyük fərq deyil, qarşıdakı oyunların sayının çox olması onu düşünməyə əsas verir ki, “Sabah” “köhlən atlar”a bir qədər də yaxınlaşa, çempionluq mübarizəsini daha da gərginləşdirə bilər. “Neftçi”nin bu gərgin mübarizəyə müdaxilə edib-etməyəcəyini demək isə xeyli çətindi. Razılaşaq ki, hazırkı şərtlər çərçivəsində 11 xallıq fərq yetərincə ciddi görünür. Bunun yaranmasının tək günahkarı isə “Neftçi” özüdü. Əsas rəqibləri ilə keçirdiyi görüşlərin üçündə də məğlub olan “ağ-qaralar” bəxtdən yox, özündən küsməlidi.

Heç şübhəsiz, qış fasiləsinə qədər aradakı fərqin daha da artmasına imkan vermədən, “transfer pəncərəsi”nin açılmasına ümid etmək olar. “Neftçi” erkən “ağ bayraq qaldırmaqla” 3-cü pilləni də əldən verə bilər. Hadisələrin hansı məcrada inkişaf edəcəyini zaman göstərəcək. Hələlik isə diqqətləri Qətərdən ayırıb, öz premyer-liqamıza yönəltməliyik. Müvəqqəti olsa da...

AMAL