FİFA-nın qadağası gündəmi zəbt etməkdə davam edir.

Bilindiyi kimi, 7 ölkə - İngiltərə, Almaniya, Niderland, Belçika, Danimarka, Uels və İsveçrə federasiyaları Qətərdə insan hüquqlarının pozulmasına görə cinsi azlıqlara dəstək məqsədi ilə kapitanların “OneLove” kampaniyasına dəstək kimi göy qurşağı təsvirində olan sarğı ilə meydana çıxmasını istəyirdi. Amma FİFA bəyan etdi ki, bu sarğı ilə meydana çıxan futbolçu matç başlayan kimi sarı vərəqə ilə cəzalandırılacaq. Bu üzdən sözügedən ölkələr bu ideyadan vaz keçməli oldular. Bu isə onlardan bəzilərinin problem yaşamasına səbəb olub. Məsələn, bu hadisə üzündən Almaniya yığmasının əsas sponsorlarından ola “Rewe” supermarketlər şəbəkəsi reklam müqaviləsini ləğv edib! Şirkətin baş direktoru Lionel Souk bunları deyib: “Biz fərqliliyin tərəfdarıyıq və futbol da bunun bir parçasıdı. Bununla yaşayırıq və öz mövqeyimizi sona qədər qoruyacağıq. FİFA-nın bu qalmaqallı mövqeyini qəbul etməyimiz mümkün deyil”. Şirkət rəsmisi əlavə edib ki, həmişə Almaniya yığmasını dəstəkləməkdə davam edəcəklər. “Rewe”nin xüsusi olaraq DÇ-2022 üçün hazırladığı geyimlərin artıq satışda olmayacağı və onların insanlara havayı paylanılacağı məlum olub. “Rewe”dən fərqli “Adidas”, “Volkswagen”, “Lufthansa” kimi şirkətlər Almaniya Futbol İttifaqı ilə olan sponsorluq anlaşmasını ləğv etmək niyyətində deyil. Baxmayaraq ki, onlar da cinsi azlıqlara dəstək nümayiş etdiriblər.

Bu arada futbolçuların da bu məsələyə münasibəti bəlli olub. Almaniya yığmasının kapitanlarından olan Coşua Kimmix bunları deyib: “Açığı, FİFA-nın bu qadağası məni çox təəccübləndirdi. Biz futbolçular problemləri qabartmaq üçün əlimizdən gələni etmişik. Məncə, artıq yenidən futbola yönəlmək, futbol haqda danışmaq lazımdı. 12 il əvvəl DÇ-nin evsahibliyi hüququ Qətərə verilmişdi və bunda mənim günahım yox idi. O vaxt cəmi 15 yaşım var idi”. Danimarka yığmasının kapitanı Simon Kyaer isə onu qorxaqlıq nümayiş etdirməkdə günahlandıranların cavabını bu sözlərlə verib: “Bu addıma görə tənqid olunduğuma inana bilmirəm. Bəziləri hətta sarı vərəqə bahasına olsa belə, bu sarğını taxacağımı gözləyirdi. Axı bu, komandaya ziyan verə bilərdi. Bu riski üzərimə götürə bilməzdim. Matçın 5-ci dəqiqəsində ikili mübarizə zamanı sarı vərəqə alıb meydandan qovulsaydım, nə olacaqdı? Bu mövzuda sualları mənə yox, FİFA rəsmilərinə verin. Adi bir sarğıya görə bizi çətin vəziyyətə salıblar. Məncə, FİFA-nın qadağasının yanlış olması ilə hamı həmfikirdi”.