Gəncə - Azərbaycanın ən qədim və gözəl məkanlarından biri və ya bir incisi.

Bura insanlarının danışığı və qonaqpərvərliyi ilə xüsusi seçilir. Gəncə vətənpərvərlik və dinə bağlılıq baxımından da başqa şəhərlərimizdən fərqlənir. Qala qapılarından içəri girəndən sonra bunu açıq-aşkar hiss edirsən. Şəhərim girişindəki küçədə 2904 şəhidimizin plakatı asılıb. Şəhərin mərkəzində isə möhtəşəm "İmamzadə" kompleksi yerləşir.

Gəncədə sonuncu dəfə 2018-ci ildə olmuşdum. Həmin vaxt "Kəpəz" "Qarabağ"la qarşılaşırdı. Ağdamlıların qələbə qazandığı matçdan xeyli vaxt ötüb. Şəhərdə çox şey dəyişib. Əvvəllər köhnə binalara çox rast gəlirdiksə, indi onları “göydələnlər” əvəz edir. Hətta icra başçısı da dəyişib. Elmar Vəliyevin vaxtında az qala jurnalistləri stadiona icazə ilə buraxırdılar. Yadıma gəlir, matçların birində rəhbərə xoş gəlsin deyə azarkeşləri doldurmuşdular media mənsublarının yanına ki, komandanı yalandan alqışlasınlar. İndi isə vəziyyət fərqlidi. Şəhəri Niyazi Bayramov idarə edir. İcra başçısı "Kəpəz"in oyunlarına gəlir, problemlərlə maraqlanır. Klub rəsmiləri ilə görüşlərindən məlumatlıyıq. "Sarı-göylər" də çox dəyişib. Mövsümün əvvəlində aşkar autsayder olan gəncəlilər indi yaxşı oyun sərgiləyir. Qərb derbisində də Tərlan Əhmədovun komandası baxımlı futbol nümayiş etdirdi. Lakin şansların boşa verilməsi "Turan Tovuz"la görüşdə 3 xal arzularının üstündən xətt çəkdi.
Yazının əvvəlində gəncəlilərin dinə bağlı olduqlarını vurğuladım. Kuçəlilər özlərini inandırmaq üçün fərqli tərzdə andlar içirlər.

Bunlardan ən şedevri "İmamzadə haqqı"dı. Bir gəncəli nəyinsə doğruluğunu isbatlamaq üçün dilə gətirdiyi fikrin sonuna mütləq şəkildə bu söz birləşməsini əlavə edir. Oyunda da qulağım bununla bağlı o qədər maraqlı cümlələr eşitdi ki:

"Qağa, Tovuzun bu uzundraz qara gədəsi (Natan Oduvanı nəzərdə tutur - S.İ.) mənim nervimə işləyir e, İmamzadə haqqı".

"Ay Şuaybu, ay Şuaybu! Bu gün qol vursan, İmamzadə haqqı, sənə özüm Gəncədən qız alacam".

"İmamzadə haqqı, bizimkilər Tovuzu sürüyür, amma qol vuran ayağımız yoxdu, qağa".

"Bu Tərlana inanmaq lazımdı dana, İmamzadə haqqı. 2 ayın içində gül kimi komanda yığıb dana".

"Qağa, İmamzadə haqqı, hamını buraxsaydılar, stadionda 20 min azarkeş olardı dana! Tikmirlər də, normal gələk futbola baxaq!"

Bunlar arenada eşitdiklərim idi. Hamısının içdən və səmimi fikirlər olduğuna əminəm. Gəncə və "Kəpəz" son 4 il ərzində çox dəyişib. Amma dəyişməyən bir şey var: stadion! Azərbaycanın ikinci böyük şəhəri tör-töküntü halında olan arenadan istifadə edir. Bu problemin hələ də davam etməsi ölkə futbolu adına ləkədi. Stadion problemi həll olunsa, "Kəpəz" daha da inkişaf edəcək. Ən azı oyunlarına 10-12 min azarkeş gələcək ki, bu da klubun büdcəsinin az da olsa, artmasına səbəb olacaq. AFFA, Gənclər və İdman Nazirliyi kluba bu yöndə kömək ola bilmədi. Ümid edirəm ki, şəhərin İcra Hakimiyyəti bu məsələni tezliklə həll edəcək. Yoxsa o stadionda oynamaq hamı üçün biabırçılıqdı, İmamzadə haqqı!

İLKİN SULTANLI