Millət vəkili, futbol həvəskarı Aqil Abbas da "Kəpəz"in ev oyunlarını Gəncədə keçirə bilməməsinə biganə qalmayıb. Onun yazısını təqdim edirik.
Gəncə Azərbaycanın ən böyük futbol məktəbidi. Və vaxtilə bu şəhərin komandası SSRİ birinciliyində, daha dəqiq desək, yüksək liqada iştirak edib, "Neftçi"nin əsas bazası olub. Adlarını saymaq istəmirəm. O zamanlar "Neftçi"nin ən məşhur futbolçuları Gəncə məktəbinin yetirmələri idi.
İndi uzun müddət ya zəlzələdən, ya vəlvələdən "Kəpəz" Azərbaycan çempionatından kənarda qalmışdı. Necə ki, "Turan Tovuz" qalmışdı. Şükürlər olsun ki, bu il hər iki komandaya "yaşıl işıq yandırıldı".
Və belə məlum oldu ki, Gəncədəki stadion oyun üçün hazır deyil. Bir il idi "Kəpəz"in yüksək liqaya qayıtması söhbəti gedirdi. Gənclər və İdman Nazirliyi və Gəncə şəhər İcra Hakimiyyəti bununla bağlı niyə bir tədbir görmürdü? Gəncəlilərə müraciət etsəydilər, iməcilik yolu ilə, lazım gəlsə, öz ciblərinin puluna stadionu hazır vəziyyətə gətirərdilər. Gəncə kimi bir şəhərin əlində bir stadionu təmir etmək nə çətin işdi? Hətta bankda hesab açsaydılar, təkcə gəncəlilər yox, başqa rayonun futbolçuları da həmin hesaba pul köçürərdillər.
Ağdamın işğalından sonra "Qarabağ", bilirsiz, niyə dağılmadı? Ağdamlılar, qaçqın ağdamlılar, zirzəmilərdə, yataqxanada yaşayan ağdamlılar əl-ələ verib bu komandanı dağılmağa qoymadılar. Düz 9 il!
İndi 400, 500 minlik Gəncədə stadionu niyə bərbad vəziyyətə düşməlidi? Bəs Gəncə niyə ev oyunlarını Bakıda keçirməlidi? "Zirə" ilə "Dalğa Arena"da oynayır. Şərhçi də deyir ki, qonaqlar, yəni "Zirə"...
"Zirə" Bakı komandasıdı. O hardan qonaq olub? Qonaq "Kəpəz" idi. İndi eşidirəm ki, yanvara qədər "Kəpəz" doğma azarkeşləri önündə çıxış edə bilməyəcək. Heç olmasa, buraxın tamaşaçısız oynasın.
Yeri gəlmişkən, Elmar Vəliyevin yeri görünür. O, Yevlaxda işləyəndə sıfırdan "Karvan" kimi komanda düzəltdi. Və komandada bir çox uğurlara imza atdı. Hələ mən onun Yevlaxda apardığı abadlıq işlərindən danışmıram. Yevlaxı Azərbaycanın ən böyük şəhərlərindən birinə çevirdi.
Çox təəssüf ki, Elmar Vəliyev Yevlaxdan gedəndən sonra "Karvan" dağıldı.
Gəncədə də ən böyük abadlıq işlərini Elman Vəliyev həyata keçirtdi. Şəhər təmiz simasını dəyişdi.
Elmar Vəliyev Gəncədə olsaydı, nəyin hesabına olur-olsun, o stadionu bir ayın içində hazır vəziyyətə gətirərdi.
Gəncənin imkanlı adamları, Allah imkanlarınzı daha çox eləsin. Bir yığışın Xan bağındakı çayxanaya, məşvərət eləyin. Türklər demiş, pamuk əllər cibə getsin...