“Məktubda adı çəkilən Yusif klubumuzun potensialı yüksək olan, perspektiv vəd edən uşaqlarından biridi. Təxminən 6 ildi rəhbərliyim altında məşq edir. Atası ilə aramızda yaşanan narazılığa baxmayaraq, mən heç vaxt nə onun, nə də başqa bir yetirməmizin irəli getməsinə, daha iddialı klublarda çıxış etməsinə maneə yaratmamışam. Bu günə kimi “Xocalı”nın bir çox yetirməsi ölkənin adlı-sanlı klublarına keçib. Onlardan bir qəpik də təzminat tələb etməmişəm. Hər bir məşqçi istəyər ki, yetirməsinin səs-sorağı zirvələrdən gəlsin. Elman bəyin məktubda “məndən 3 min manat təzminat istədi” yazması absurddu. Birincisi, ortada elə bir fakt yoxdu. Ortaya səsyazısı və ya başqa bir sənəd çıxarsın. İkincisi, sənəd saxtalaşdırmasından söz gedirsə, onu sübut etsin. Elə məsələlər var ki, onun ictimailəşməsini istəməzdim. Müqavilə sənədlərini sizə təqdim edirəm. Görün burda hansısa saxta iş var? 2020-ci ilin sentyabrında imzalanan sənədlərdi. Həmin vaxt Yusifdən başqa bir neçə uşaqla da müqavilənin müddətini uzatmışıq. Bir nəfər olsaydı, düşünərdik ki, nəyisə səhv salmışıq, hardasa saxtakarlığa yol vermişik. Ancaq eyni tarixdə bir neçə futbolçu ilə anlaşmanın müddətini uzatmışıq. Söylədiklərim bir daha sübut edir ki, ortada heç bir saxtakarlıqdan, təzminatdan söhbət gedə bilməz. Uşağın atasının redaksiyanıza ünvanladığı məktubda yazılanlar həqiqəti əks etdirmir”.

“Yenə deyirəm, hər bir məşqçi istəyər ki, yetirməsi daha uca zirvələri fəth etsin. Bilirəm ki, Yusif nə vaxtsa həmin səviyyəyə çatacaq və onda özü gəlib mənə və onunla məşğul olan qapıçı məşqçisinə minnətdarlıq edəcək. Onun “Qəbələ”yə keçidində problem yoxdu, qarşı tərəf sorğu göndərəcəyi halda transfer vərəqini onlara təqdim edəcəyik. Valideynin nə yazmasından, söyləməsindən asılı olmayaraq, biz işimizi görmüşük. Bundan sonra da “Xocalı” klubu ölkə futbolu üçün futbolçu yetişdirəcək”.