“Gələn il Çempionlar Liqası üçün qayıdacağıq” - “Arsenal”ın qələbə paradına milyona yaxın azarkeş qatıldı
“Arsenal” mayın 31-də premyer-liqada qazandığı çempionluq münasibəti ilə Londonda qələbə paradı keçirdi. Hətta Çempionlar Liqasının finalında PSJ-dən alınan məğlubiyyət “topçular”a könül verən azarkeşlərin bayram əhval-ruhiyyəsinə təsir etmədi.
"Football-plus.az" xəbər verir ki, bayram təntənələri “Emireyts” stadionundan başladı. Paradda “Arsenal”ın həm kişilərdən, həm də qadınlardan ibarət komandası qatıldı – xanımlar da UEFA-nın qadınlar üçün keçirdiyi ÇL-in qalibi olub. Paradın əsas kolonu dörd avtobusdan ibarət idi – onların hər birində kişi və qadın futbolçular yer almışdı. Onlar dayanmadan azarkeşləri salamlayırdılar. Bundan başqa, avtobuslarda xidmət personalı, seçilən klub əməkdaşları və fanatları, həmçinin xüsusi qonaqlar yer almışdı. Avtobus karvanının önündə diceyi də daşıyan yük maşını gedirdi.
“Topçular”ın vingeri Qabriel Martinelli başverənləri möcüzə adlandırdı. Əlinə mikrofon götürən braziliyalı bunları dedi:
“Bu zəfər azarkeşlər və bu yolun bir hissəsi olan hər kəs üçündü. Hər şeyimizi meydanda qoyduq. İndi isə bu anı azarkeşlərlə bölüşmək bizə təsvir olunması çətin hisslər bəxş edir”.
Yarımmüdafiəçi Mikel Merino da xoşbəxt görünürdü:
“Bu klubun heyranıyam. Dünyanın ən güclü liqasında çempion olmaq, kubok qaldırmaq... Bundan daha artığını istəyə bilmərəm”.
“Arsenal”ın liderlərindən biri Deklan Rays bundan sonra da qələbələr qazanacaqlarına söz verdi:
“Mən bu klubu, baş məşqçini və azarkeşləri sevirəm. Biz hələ bitirməmişik, daha artığını istəyirik. Növbəti mövsüm Çempionlar Liqasında qələbə arxasınca qayıdacağıq. Siz ya bu olayın bir hissəsi olacaqsız, ya da kənarda dayanın”.
“Topçular”ın penalti seriyasında uğursuzluğa düçar olan müdafiəçisi Qabriel də fanatlardan dəstək gördü. Paradda qaldırılan bannerlərdən birinin üzərində belə yazılmışdı:
“Qabriel, onsuz da biz səni sevirik”.
Futbolçu özü azarkeşlərdən üzr istədi:
“Çox ağrılı idi. Ancaq komanda və bu mövsüm nail olduqlarımız ilə qürur duyuram. Hər addımda gördüyümüz dəstəyə görə qeyri-adi fanatlarımıza “çox sağ olun” demək istəyirəm. Bu uğuru bizlə birgə bayram etməyə layiqsiz, paraddan ləzzət alın”.
Toplaşanlara çempionluq kuboku da göstərildi – qənimət “Arsenal”ın baş məşqçisi Mikel Artetanın əlində idi. Fanatların bir çoxu işıqforların, dayanacaqların, telefon köşklərinin üzərinə qalxmışdı ki, qəhrəmanları yaxından görsün.
“Arsenal”ın Londondakı paradına nəhəng kütlənin qatılacağı əvvəldən bəlli idi: polis hətta xüsusi açıqlama yayaraq azarkeşlərdən təhlükəsizlik mülahizələri üzündən Çempionlar Liqasının finalı zamanı “Emireyts”in qarşısında toplaşmamağı xahiş etmişdi. Hakimiyyət orqanları səhv etmədi – “topçular”ın fanatları həmin gün səhər saatlarından ölkənin hər yerindən paytaxta axışmağa başladı. Hər yeni qatar şəhərə qədəm qoyduqca ağ və qırmızı rəngli forma geyən azarkeşlərin əlindən tərpənmək olmurdu. Şəhər sanki azarkeş dənizinə düşmüşdü.
Parada qatılanların sayı ilə bağlı fərqli rəqəmlər var. Polis əvvəlcə təxmini rəqəm səsləndirdi – 800 min. Sonradan İngiltərə mediası rəqəmi dəqiqləşdirdi – bir milyona yaxın adam. Beləcə “Arsenal”ın paradı Londonun tarixinə ən böyük hadisələrdən biri kimi düşdü.
Xatırladaq ki, paytaxt klubu premyer-liqada sona bir tur qalmış çempionluğu təmin etdi. Bu, “topçular”ın son 22 ildəki ilk çempionluğudu.
Digər xəbərlər
