Ukrayna çempionatı tamaşaçısız keçiriləcək
Ukrayna Gənclər və İdman Nazirliyi (UGİN) 2022/23 mövsümündən başlayaraq futbol üzrə ölkə çempionatının təşkilinə icazə verib.
Football-plus.az xəbər verir ki, bu qərar polis və müdafiə strukturları ilə razılaşdırıldıqdan sonra qüvvəyə minib.
Bilindiyi kimi, Rusiyanın Ukraynaya hərbi hücumundan sonra, fevralın sonlarında ölkədə futbol da daxil olmaqla bütün idman yarışları dayandırılıb. Premyer-liqaya avqustun 23-də start veriləcək. Bu haqda UGİN-nin rəhbəri Vadim Qutsayt məlumat verib:
“Ölkədə müharibə davam etdiyindən yeni futbol mövsümündə oyunlar azarkeşlərin iştirakı olmadan keçiriləcək. Matçlarda yalnız akkreditə olunmuş məhdud sayda şəxslərin - futbolçuların, məşqçilərin, hakimlərin, texniki heyətin, oyunun rəsmi şəxslərinin, akkreditə olunmuş KİV nümayəndələrinin, tibbi xidmətin, Dövlət Fövqəladə Hallar Xidmətinin və Milli Polisin əməkdaşlarının iştirakına icazə verilir. İdman qurğularının operatorlarından evakuasiya planı və sığınacaqlar haqda məlumat vermələri tələb olunur. Arenalar bütün dövlət təhlükəsizlik qaydalarına uyğun gəlməlidi ki, yarışlarda iştirakçıları tam tərkibdə qəbul edə bilsinlər. Bundan başqa, stadionlardan 500 metrdən çox olmayan məsafədə sığınacaqlar olmalıdı. Hava hücumu xəbərdarlığı zamanı stadionun diktoru bunları elan etməlidi: “Diqqət! Hava xəbərdarlığı! Hər kəsdən sığınacağa getməyi xahiş edirik!” Bu zaman matçın hakimi dərhal oyunu dayandırmalı, köməkçiləri və komandalarla birlikdə sığınacağa yollanmalıdı”.
Digər xəbərlər
