Rusiyanın Ukraynaya hərbi təcavüzünün davam etməsi UEFA-nı növbəti qərar çıxarmağa vadar edib.

"Football-plus.az" xəbər verir ki, Ukrayna ilə Belarus klubları və yığmaları növbəti mövsümdə UEFA-nın bayrağı altında keçirilən turnirlərdə bir-birinə rəqib ola bilməyəcəklər. Qitə futbol qurumunun qərarı dərhal qüvvəyə minib və növbəti xəbərdarlığa qədər qüvvədə qalacaq. Təşkilatın bəyanatında bu qərarın qitəmiqyaslı yarışlarının normal və təhlükəsiz keçməsini təmin etmək üçün qəbul edildiyi bildirilib. UEFA mövcud şəraitdə komandaların, rəsmi şəxslərin və digər iştirakçıların təhlükəsizliyinə tam təminat verməyin mümkün olmadığını etiraf edib. Məlumatda UEFA-nın İcraiyyə Komitəsinin hüquqi və faktiki vəziyyəti yenidən qiymətləndirmək üçün növbəti iclaslar keçirməyə hazır olacağı da vurğulanıb.

Xatırladaq ki, Rusiya klubları və milli komandaları Ukrayna ilə təcavüzkar müharibəyə görə UEFA-nın bayrağı altında keçirilən yarışlardan kənarlaşdırılıb.
Müharibədə Rusiyaya dəstək verən Belarus komandaları isə ev oyunlarını netral meydanlarda və tamaşaçısız keçirəcək.