Vaxtilə “Neftçi” və “Qarabağ” kimi iddialı klublarda çıxış edən millinin sabiq üzvü Elvin Yunuszadə uzun müddət idi futboldan kənarda qalmışdı.

Son illərdə legioner həyatı yaşayan müdafiəçi ötən il “Şkupi”dən “Keşlə”yə keçdi. Lakin bu komandada da şans qazana bilmədi. Onun artıq yeni komandası da bəllidi. 29 yaşlı müdafiəçi elitaya qayıdan “Kəpəz”in uğurları üçün çalışacaq. Maraqlıdı, Yunuszadə futbolsuz qaldığı müddətdə nə işlə məşğul olub? Onunla bu və başqa məsələlər ətrafında söhbətləşdik.

- Təxminən iki il futboldan uzaq qaldın. Yenidən futbola, premyer-liqaya qayıdırsan. “Kəpəz”ə keçid necə baş tutdu?

- Düzdü, futboldan bir az uzaq qaldım. Amma məşqlərə davam edirdim. Şəxsi məşqçim var idi, onunla bir yerdə hazırlaşırdım. Məşqləri rayonda keçirdim. Havasına, suyuna görə rayon mənim üçün daha rahat idi. Bir gün Gəncəyə gedəndə futbolçu yoldaşlarla yolüstü görüşmək istədim. Elə oldu ki, Yaşar Vahabzadə ilə də görüşdük. Uzun illər milli komandada məşqçim olub. Dedim ki, tək məşq edirəm, istəyirəm komandayla məşqlərə qoşulum. Sağ olsun, şərait yaratdı. Çempionat bitəndən sonra isə söhbət etdik və “Kəpəz”lə müqavilə bağladım.

- İşsiz qaldığın müddətdə dolanışıqda problem yaşamadın?

- Belə deyək, mən bir mövsüm futboldan uzaq qaldım (gülür). Ondan əvvəl oynayırdım. Min şükür, pis-yaxşı dolandıq.

- Bir məşqdən kənarda qalmaq belə idmançıya mənfi təsir göstərir. Bu müddətdə fərdi məşq etsən də, komanda şəklində nə hazırlıq keçdin, nə də oyuna çıxdın. Bu məqam növbəti mövsüm problem yaratmayacaq?

- Əlbəttə, oyamaq futbolçu üçün çox vacibdi. Amma belə baxanda, 1 il zədəyə görə oynamayan futbolçular var. Tədricən məşqlərə, yoldaşlıq oyunlarına çıxanda özünə gəlirsən. “Qarabağ”dan ayrılandan sonra da bir müddət oynamadım. Ondan sonra “Səbail”ə keçdim. Elə 1-ci turda həm qol vurdum, həm də turun ən yaxşı oyunçusu seçildim. Amma çox adam deyirdi ki, uzun müddətdi oynamırsan, çətinlik olacaq. Doğru iş görürsənsə, məşqlərini düzgün edib hazırlaşırsansa, niyə də düzəlməyəsən?! Bilirəm ki, bir neçə oyundan sonra hər şey qaydasına düşəcək.

- Bir neçə klubla danışıq apardığını demişdin. “Kəpəz”i seçməyinə nə səbəb oldu?

- Təbii ki, Yaşar Vahabzadə. Milli komandada uzun illər bir yerdə işləmişik. Onun futbol fəlsəfəsinə bələdəm. Həm də “Kəpəz” böyük tarixə malik komandadı. Bura keçmək mənim də ürəyimcə oldu. Yaşar müəllim də mənə çox inanır, potensialımı bilir.

- Başqa hansı klublardan təklif var idi?

- Açığı, heç bir klubla danışmamışdım. Çünki çempionat bitmədən “Kəpəz”də məşq etməyə başlamışdım. Ona görə başqa klubla danışıq aparmağım düzgün olmazdı. Bu komandaya keçidim alınmasaydı, başqaları ilə danışıqlar baş tutacaqdı.

- “Kəpəz” növbəti mövsüm sözünü deməyi bacaracaq?

- Heç kimin bizdən asanlıqla xal almaması üçün vuruşmalıyıq. İnşallah, avrokuboklara vəsiqə uğrunda mübarizə aparacağıq.

- Sabiq klubların “Neftçi” və “Qarabağ”dan avrokuboklarda nə gözləyirsən?

- Ümumiyyətlə, “Neftçi”ylə “Qarabağ” oynadıqları hər turnirdə iddialı olublar. Hər iki komandanın rəqibi “dişinə görədi”. Asanlıqla keçə biləcəkləri rəqib olmasa da, inşallah, növbəti mərhələyə vəsiqə qazanacaqlarına inanıram.

ŞAİR ABDULLA