Elvin Yunuszadə təklifləri dəyərləndirir - AÇIQLAMA
2022/23 mövsümündə premyer-liqada çıxış edəcək “Kəpəz”də hələ ki sükut pozulmayıb.
Gəncə təmsilçisinə nə gələn var, nə də gedən. Lakin son günlərdə Yaşar Vahabzadənin çalışdırdığı komandaya Elvin Yunuszadənin qoşulacağı gündəmdədi. Görəsən, onun keçidi nə vaxt rəsmiləşəcək? Bunu öyrənmək üçün Yunuszadə ilə danışmağa qərar verdik.
Bir müddətdi futboldan uzaq qalan futbolçunun qəzetimizə açıqlaması belə oldu:
“Bir müddətdi futboldan uzaq olsam da, idmandan uzaq deyildim. Fərdi məşqlər edib üzərimdə çalışırdım ki, yeni mövsümə hazır olum. Təkliflər var. Danışıq aparıram. Düşünüb qərar verəcəm”.
Elvin vaxtilə formasını geydiyi “Neftçi”nin baş məşqçi Samir Abasovla yolları ayırmasına da münasibət bildirdi:
“Belə deyim, biz baş məşqçinin göndərilməsinə kənardan baxıb fikir bilidiririk. Lakin daxildə nələrin baş verdiyini bilmərik. Buna görə də dəqiq bir şey demək çətindi. Ancaq Samir Abasov sözünü demiş məşqçidi. Onun futbol fəlsəfəsi də göz qabağındadı. Mən də çox bəyənirəm. “Neftçi”ni uzun müddətdən sonra çempion etdi. Ancaq dediyim kimi, klub rəhbərliyinin onun qarşısına qoyduğu məqsədləri bilmirik. Yəqin ki, nəsə düz getməyib. Ona görə də yollar ayrılıb. Buna baxmayaraq, inanıram ki, Samir müəllim yenə hansısa klubda çalışıb Azərbaycan futboluna xeyir verəcək”.
SƏNƏM FƏRHADOVA
Digər xəbərlər
