16 iyun Azərbaycan futbolu üçün əhəmiyyətli tarixdi.

Bu gün hazırda “Zirə”nin baş məşqçisi olan, uzun illər ölkə futbolu üçün əziyyət çəkən, həm millidə, həm də “Qarabağ”da kapitan kimi çıxış edən Rəşad Sadıqovun doğum günüdü. Onun 40 yaşı tamam olur.

Rəşad Sadıqov xoşbəxt biridi. Çünki bu gün Azərbaycan mediasının manşetləri onunla bağlı yazılarla bəzədilib. Hər kəs onun şəninə tostlar deyir. Bu da normaldı. Çünki adam uğurlu personadı. Bu gün ölkə futbolunun inkişaf etməsi üçün çalışır. Rəhbərlik etdiyi “Zirə”ni gündən-günə daha da gücləndirmək istəyir. Bunu da hər kəs görür. Düzdü, ona qarşı haqsızlıqlar olur. Bütün bunlara rəğmən, mübarizəsini davam etdirir. Bu gün nə qədər bacarığın olsa da, əsas gücünün olmasıdı. Rəşad Sadıqov xoşbəxtdi ki, bunların hər ikisinə sahibdi. Bu gün onun arxasında dayanan Orxan Məmmədov kimi fəxri-prezident, Taleh Zeynalov kimi rəhbər, Qurban Qurbanov kimi dost və güclü media ordusu var. Buna rəğmən, sadə camaatın sevgisini özü qazanıb.

Bu gün gənc mütəxəssis haqda nəsə yazmaq olduqca çətindi. Çünki yuxarıda qeyd ediyim kimi, bütün mediada və sosial şəbəkələrdə Rəşad Sadıqovun doğum günü ilə bağlı cızma-qara ediblər. “Zirə”nin baş məşqçisinin etdikləri hamıya bəllidi. Müxtəlif sinonimlərdən istifadə edib, tərif motivində yazmaq istəmirəm. Lakin Rəşad Sadıqov üçün arzularım var. Ümid edirəm ki, 40 yaşlı mütəxəssis 10 ildən sonra premyer-liqada azı 3 dəfə çempionluq sevinci yaşayar. Rəhbərlik etdiyi komandası ən azı 1 dəfə Çempionlar Liqasının, 4-5 dəfə isə Avropa Liqasının və ya Konfrans Liqasının qrupunda mübarizə aparar. Arzu edirəm ki, 50 yaşı tamam olanda da ölkə başçısı onu futbolumuza verdiyi töhfələrə görə “Şöhrət" ordeni ilə təltif edər.
O günlərdə bir dostumla futbol barədə söhbət edirdim. Mənə “Kaladze Gürcüstanın əvvəlcə futbolda, indi isə idarəçilikdə döyünən ürəyidi. Düşünürdüm ki, Rəşad Sadıqov da onun kimi olacaq. Düzdü, Kaladze siyasətçi oldu, amma Rəşad futbolda idarəçi ola bilər.Mən onda bu potensialı görürəm”, - deyə bildirdi. Cavabım isə belə oldu: “Bəlkə də özü də düşünür ki, hələ tezdi”.

Arzu edirəm ki, 10 il sonra Rəşad Sadıqov insanların bu gözləntisini doğruldub, ölkə futboluna fayda verər. Bunu isə artıq zaman və Rəşad Sadıqov bilər...

İLKİN SULTANLI