DÇ-2022-nin seçmə mərhələsinin İran – Litva oyununa qadın azarkeşlər buraxılmayıb.

İtaliya futbolunu sevənlər belə düşünür ki, qonşu ölkənin yığması buna görə mundial iştirakçıları sırasından çıxarılacaq, onun yerini DÇ-yə vəsiqə qazana bilməyən komandalar arasında ən yüksək reytinqə malik “skuadra adzurra” tutacaq.
Nə baş verir?

İran və Livan yığmaları arasında oyunun (meydan sahibləri 2:0 hesabıyla qalib gəlib) keçirildiyi “Azadi” stadionunun tribunalarına qadınlar buraxılmayıb. İnsan hüquqlarının pozulması hallarının monitorinqi ilə məşğul olan “Human Rights Watch” təşkilatının informasiyasına görə, onlar əllərində bilet olmasına baxmayaraq, oyunu stadiondan izləyə bilməyiblər. Qadınlara münasibətdə fiziki güc tətbiq olunması ilə bağlı gümanları isə “Əl-Cəzirə” təsdiqləyir. Adı çəkilən telekanal iddia edir ki, stadion əməkdaşları bibər qazından yararlanıb. Gözlənildiyi kimi, İran televiziyası insidentlə bağlı susub. Yığmanın kapitanı Əlirza Cahanbaxş milli telekanala müsahibə verib. Ancaq qadınların futbola baxıb-baxmaması ilə bağlı sual senzuraya məruz qalıb və efirə çıxmayıb. Yeri gəlmişkən, qollardan birini oyunun ən yaxşısı seçilən Cahanbaxş, digərini isə Sərdar Azmun vurub.

Federasiya 2 min saxta biletin aşkarlandığını deyir
İran Futbol Federasiyası artıq bəyanatla çıxış edərək, iki minə yaxın qadının məhz saxta biletlər üzündən stadiona buraxılmadığını bildirib. Bəyanatda qeyd olunur ki, yalnız 9 qadın rəsmi bilet alıb və maneəsiz şəkildə tribunadakı yerini tutub. İranın baş prokuroru Məhəmməd Cəfər Müntəziri bəyan edib ki, hakimiyyət orqanları oyuna buraxılmayanlardan üzr istəməli və onlara kompensasiya ödəməlidi. Prezident İbrahim Rəisi isə daxili işlər nazirinə qalmaqalı araşdırmağı tapşırıb.

“Human Rights Watch”un İrandakı aparıcı mütəxəssisi Tara Sepehri Far əmindi ki, FİFA məmurları məsələyə müdaxilə etməlidi:

İranda 40 il qadınlar stadiona buraxılmayıb
Bildiyiniz kimi, 1979-cu ildə İranda baş verən İslam inqilabından sonra qadın azarkeşlərin kişi komandalarının oyunlarını stadiondan izləməsinə qadağa qoyulub. 2019-cu ilin sentybrında Səhər Xudayarinin faciəvi şəkildə özünü yandırması ilə vəziyyət dəyişib. Stadiona kişi geyimində daxil olmağa çalışan Səhər saxlanılıb. Həbs cəzası alacağından çəkinən xanım elə məhkəmə binası önündə özünü yandırıb və bir həftə sonra xəstəxanada dünyasını dəyişib. Bu qalmaqal bütün dünyada böyük əks-səda doğurub. Avropada bir çox qadın futbolçu yaşıl meydana Səhərin xatirəsinə hörmət əlaməti kimi mavi sarğı ilə çıxıb. FİFA-nın təzyiqindən və İranı cinsi diskriminasiya hallarını aradan götürməyə çağıran İnfantinonun çıxışlarından sonra 2019-un oktyabrında hökumət 3,5 minə yaxın qadının dünya çempionatının seçmə mərhələsinin İran – Kamboca oyununu izləməsinə icazə verib. Son 40 ildə ilk dəfə belə hadisə yaşanıb. Maraqlıdı ki, DÇ-2018 vaxtı İranda qadınları oyunların geniş ekranda göstərildiyi “Azadi” stadionuna buraxıblar. Amma Livanla oyun ətrafında başverənlər qonşu ölkənin siyasi və futbol rəhbərliyinin başını yenidən ağrıdacaq.