Aprelin 2-də futbolumuzda yeni dönəmin başladığını düşünürdük. AFFA rəhbərliyində baş verən dəyişikliklərin yeni layihələrə, inamlı addımlara, qələbəli günlərə, qısası, intibah dövrünə aparacağını zənn edirdik. Xam xəyallara dalırdıq ki, milli komandalarımız “çiçəklənməyə” başlayacaq.

Düzdü, elə o vaxtdan aysberqin görünməyən tərəfləri haqda yazmış, xəbərdarlıq etmişdik ki, müəyyən sahələr üzrə konkret plan əsasında inkişafa meyilli olmadıqca, nəsə dəyişməyəcək. Lakin ümidlərin sonda ölməsi bizim qəlbimizdə də bir qədər titrəyiş yaratmışdı. Hər halda, hələ “dişə çəkiləsi” uğur qazanılmayıb...

Yeni AFFA rəhbərliyinin ən ciddi addımı yığmanın baş məşqçi postuna Fernando Santuşun gətirilməsidi. Yığmamız postuqaliya mütəxəssisin rəhbərliyi altında hələ ki bir turnirdə çıxış edib. Söhbət Millətlər Liqasından gedir ki, kollektiv 6 matçda cəmi bir xal qazandı və sonuncu pillədə qərarlaşdığından D liqasına yuvarlandı. Bunun adı tarixi enişdən, milli faciədən, görünməmiş fiaskodan başqa bir şey deyil. Razıyıq. Amma yenə vurğulayaq ki, mövzu məhz uğursuz baş məşqçi seçimi və ya çalışdırıcının səhv seçimlərindən ibarət deyil. Şablon ifadədi, amma deməkdə fayda var: problemin kökü daha dərindədi!

Yığmamızın İsveçə 0:6 hesablı məğlubiyyətindən təxminən iki həftə keçib. Bəs bu mövzuya niyə qayıtdıq? Daha doğrusu, oxucularımızın yarasını deşməkdə məqsədimiz nədi? Əsas məsələyə keçid alaq.

Son günlər Fernando Santuşun istefa verəcəyi ilə bağlı xəbərlər intensivləşib. İddialara inansaq, mütəxəssisin işi AFFA rəhbərliyini qane etmədiyindən baş məşqçi yola salınacaq. Amma nəticələrdə ən az pay sahibi olan şəxs bəlkə elə Santuşdu.

Artıq türkiyəli mütəxəssis Abdulla Avcının millimizi çalışdıracağı haqda xəbərlər dolaşır. 4 il əvvəl olduğu kimi. Xatırlayırsızsa, 2020-ci ildə də belə məlumat yayılmış, məsələyə “TRT Spor” nöqtə qoymuşdu:

İndi iddia olunur ki, Öndər Karavəlinin ölkəmizə gəlişi də məhz bu məsələylə bağlıdı. Guya Avcı mütəxəssisi Bakıya göndərib ki, hadisələrin axarını təhlil etsin və lazımi məlumatı topladıqdan sonra özünə çatdırsın. Yəni məşqçi Karavəlinin hesabatından sonra millimizlə bağlı konkret qərar verəcək. Dünən Abdulla bəylə əlaqə saxlamağa cəhd göstərsək də, mesajlarımız və zənglərimiz cavabsız qaldı. Belədə Türkiyədəki qaynaqlarımıza müraciət etdik. Bəlli oldu ki, qardaş ölkənin gündəmində belə müzakirə yoxdu.

Avcının sonuncu iş yeri Türkiyənin dörd nəhəngindən biri olan “Trabzonspor”du. Xatırlayırsızsa, mütəxəssis bu komandanı 2021/22 mövsümündə - 38 illik fasilədən sonra çempion etmişdi. Ötən “futbol ili”nin gedişində yenidən kollektivi çalışdırmağa başlayan Avcı bu mövsümün əvvəllərində uğursuz nəticələr üzündən istefaya göndərildi. O, hazırda işsizdi. Belədə adının yığmamızla hallanmasını normal qəbul edə bilərik. Lakin bunun üçün Santuşla vidalaşmaq lazımdı. Bunun üçün də gərək İcraiyyə Komitəsinin iclası keçirilsin. AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədlinin qəzetimizə verdiyi məlumata görə, iclasın dekabrda keçiriləcəyi dəqiqləşsə də, tarix hələ bilinmir. Yeri gəlmişkən, yığmanın baş məşqçisi postuna namizədlər sırasında Robert Prosineçkinin də adı var.

Bu hələ harasıdı?! Söhbət yeni gündəmə gəlib. Qarşıdakı günlərdə daha bir neçə mütəxəssisin ismi yığmamızla hallanacaq. Əsas məsələ isə yenə arxa pərdədə qalacaq: millimizin problemi baş məşqçilərlə bağlı deyil! Futbolçu yetişdirin! Müasir standartlara uyğun infrastruktur qurun! Başqa sözlə, Ferstappen hara, “Jiquli” hara?!

KƏNAN BAHADIR