Yay fasiləsi başa çatmaq üzrədi. Yeni futbol mövsümünün başlamasına 2 gün qalıb.

Avqustun 4-də keçiriləcək “Araz-Naxçıvan” – “Turan Tovuz” matçı ilə ölkə çempionatında növbəti mövsümə start veriləcək. Beləliklə, azarkeşlərin premyer-liqa həsrəti bitəcək. Klubların tansfer çalışmaları da, demək olar ki, sona çatıb. Lakin “pəncərə”nin sentyabrın 5-i, saat 23.59-a qədər açıq qalacağını nəzərə alsaq, hələ də yeni futbolçuların keçidini görmək ehtimalı yüksəkdi.

Təxminən 2 aylıq fasilə dönəmi klublar üçün çox vacib idi. Mütəxəssislər həmin dövrdə ötən mövsüm qeydə alınan çatışmazlıqları aradan qaldırmağa və hədəflərə uyğun hazırlıq prosesi keçməyə çalışdılar. Kimin buna nə qədər nail olduğunu premyer-liqa qarşılaşmalarında müşahidə edəcəyik. Yeni transferlərdən və komandanı tərk edənlərdən sonra heyətin gücünü müəyyənləşdirməyin və futbolçuları düzgün təhlil edə bilməyin ən rahat yolu yoxlama görüşləri keçirməkdi. Yerli klublar da bu yöndə imkandan maksimum istifadə etməyə çalışdı. Gəlin, komandaların yay fasiləsində keçirdiyi yoldaşlıq oyunlarını xatırlayaq, onların nəticələrini və kimin necə təsir bağışladığını yada salaq.

10 premyer-liqa komandasından 8-i təlim-məşq toplanışını ölkə xaricində keçirdi. “Araz-Naxçıvan” vaxtın məhdud olmasına, “Kəpəz” isə büdcə çatışmazlığına görə əcnəbi rəqiblərlə qarşılaşmaqdan məhrum oldu. Belə ki, Naxçıvan təmsilçisi Bakı və Qəbələdə, Gəncə təmsilçisiə, sadəcə, paytaxtda toplaşdı. Qalan klublar - “Qarabağ” və “Sabah” Avstiyaya, “Neftçi” Rusiyaya, “Qəbələ”, “Zirə”, “Turan Tovuz”, “Sumqayıt” və “Səbail” isə Türkiyəyə yollandı. Xüsusi qeyd etmək yerinə düşər ki, “Neftçi” Sankt-Peterburqda təşkil edilən “PARI Premyer” kubokunda iştirak edən 4 komandadan biri oldu. Elita klubları ümumilikdə 35 yoxlama görüşündə gücünü sınadı. Bundan başqa, “Kəpəz” əvəzediciləri ilə qarşılaşdı – 5:0. Qeyd edək ki, “Səbail” də ikinci komandası ilə görüşməyi planlaşdırır. Lakin hələ gün və saat müəyyənləşməyib. “Araz-Naxçıvan”ın isə rəqib tapılmadığından Qəbələdə yoxlama oyunu keçirə bilmədiyini xəbər vermişdik. Muxtar Respublika təmsilçisi futbolçularının iştirakı ilə iki heyət quraraq matç keçirmişdi. İndi isə sözügedən matçların qısa icmalına nəzər salaq.

Qarabağ
Ferentsvaroş (Macarıstan) 3:3
Legiya (Polşa) 0:2
ÇSKA (Bolqarıstan) 1:0

Sabah
Qəbələ 2:2
Əl-Sədd (Qətər) 3:1
Sankt-Pauli (Almaniya) 1:4
Olimpiakos (Yunanıstan) 1:1

Neftçi
Zenit (Rusiya) 1:3
Srvena Zvezda (Serbiya) 0:4
Fənərbaxça (Türkiyə) 0:1
Spartak (Moskva, Rusiya) 0:2

Qəbələ
Sabah 2:2
Sukleya (Moldova) 4:2
Orenburq (Rusiya) 1:1
Qostivar (Şimali Makedoniya) 3:1

Zirə
Kəpəz 2:1
Fatih Karagümrük (Türkiyə) 0:0
Simba Sport (Tanzaniya) 1:1
Kocaelispor (Türkiyə) 0:0

Turan Tovuz
Araz-Naxçıvan 5:1
Adana Dəmirspor (Türkiyə) 2:1
Eyupspor (Türkiyə) 2:1
Simba Sport (Tanzaniya) 1:0

Sumqayıt
Sivasspor (Türkiyə) 0:1
Ərzurumspor (Türkiyə) 3:4

Kəpəz
Səbail 1:2
Zirə 1:2
Araz-Naxçıvan 1:1
Səbail-2 4:2

Səbail
Kəpəz 2:1
Ərzurumspor (Türkiyə) 4:3
Sivasspor (Türkiyə) 1:1
Konyaspor (Türkiyə) 2:0

Araz-Naxçıvan
Turan Tovuz 1:5
Kəpəz 1:1

Göründüyü kimi, bütün klublar yay fasiləsindən məqsədəuyğun istifadə edə bilməyib. Nəticələrin ürəkaçan olmadığını desək, yanılmarıq. Düzdü, hər kəs yaxşı bilir ki, yoxlama oyunlarında nəticə önəmli deyil. Lakin komandanın uduzması hansısa çatışmazlıqdan xəbər verir. Statistikaya görə rəqiblərini aşkar üstələyən klublar “Turan Tovuz”, “Səbail” və “Qəbələ” olub. “Sumqayıt”la “Neftçi” isə sözün əsl mənasında fiasko yaşayıb. Düzdü, Bakı təmsilçisinin rəqibləri çox çətin idi. “Fənərbaxça”, “Srvena Zvezda” və “Zenit” kimi klubların qarşısına baş məşqçisiz çıxmaq cəsarətli addım olduğu qədər də qeyri-peşəkarlıq idi. Lakin futbolçuların həmin komandalardan nəsə “götürdüyünə” inanmaq istəyirik. Belədisə, “Neftçi”nin praktiki cəhətdən qənaətbəxş vəziyyətdə (nəticəni saymasaq – red.) olduğunu demək olar. “Sumqayıt”ın Türkiyə səfəri tələsik alındı. Bəlkə də “Araz-Naxçıvan” kimi gecikdiklərini etiraf edib vətəndə oyun keçirsəydilər, daha yaxşı olardı. “Qarabağ” premyer-liqanın dəyişməz lideri olduğundan hər kəs qələbə gözləyir. Nə olsun ki, rəsmi matç deyil?! Azarkeşlər haqlı olaraq ölkə çempionunun uduzmasını istəmir. Çünki məğlubiyyət həyəcan siqnalıdı. “Köhlən atlar” 2 dəfə rəqibinə güc gələ bilmədi. “Qəbələ”, “Zirə” və “Sabah”da isə vəziyyət yaxşıdı. “Zirə” heyət dəyişikliyini qabartmadan möhkəmlənməyi seçdi. “Qəbələ”, demək olar ki, yenidən quruldusa, Elmar Baxşıyev komandanın formalaşdırılması prosesini yubatmadı. “Sabah” beynəlxalq səviyyəli rəqibinə 3 top fərqi ilə məğlub olan iki komandadan biridi (digəri “Neftçi” – red.)

Ümumiyyətlə, yay fasiləsində hansısa sabitliyin olduğunu iddia etmək doğru olmaz. Xeyli qarışıqlıq var. Durumu daha aydın təhlil edə bilmək üçün nəticələri turnir cədvəlinə köçürdük.

Turan Tovuz 4 4 0 0 10-3 12
Səbail 4 3 1 0 9-5 10
Qəbələ 4 2 2 0 10-6 8
Zirə 4 1 3 0 3-2 6
Sabah 4 1 2 1 7-8 5
Kəpəz 4 1 1 2 7-7 4
Qarabağ 3 1 1 1 4-5 4
Araz-Naxçıvan 2 0 1 1 2-6 1
Sumqayıt 2 0 0 2 3-5 0
Neftçi 4 0 0 4 1-10 0

Gözlənildiyi kimi, “Neftçi” sonuncudu. “Turan Tovuz” isə liderliyə yiyələnib. Nəticələrə rəqiblərin potensialı da xeyli təsir edir. Beləliklə, klublar yay fasiləsi dövründə 12 ölkənin təmsilçiləri ilə qarşılaşıb. Yuxarıda onların əsasən Türkiyəyə yollandığını yazmışıq. Elə bu üzdən ən çox qarşılaşma da qardaş ölkənin komandaları ilə baş tutub. Beləliklə, premyer-liqa iştirakçıları Türkiyə klubları ilə qarşılaşmalarda yaxşı təsir bağışlayıb. Rusiya təmsilçiləri isə bizimkilərə güc gəlməkdədi. Maraqlıdı ki, “Səbail” də, “Turan Tovuz” da Türkiyə klublarına məğlub olmadı. “Sumqayıt” isə hər iki matçı məyus bitirdi. Beləliklə, hansı ölkələrin təmsilçiləri ilə neçə dəfə qarşılaşdığımızı, hansı nəticələrə imza atdığımızı və xəyali xalı əks etdirən cədvələ nəzər yetirək.

Türkiyə 10 4 3 3 14-11 15
Tanzaniya 2 1 1 0 2-1 4
Ş.Makedoniya 1 1 0 0 3-1 3
Qətər 1 1 0 0 3-1 3
Moldova 1 1 0 0 4-2 3
Bolqarıstan 1 1 0 0 1-0 3
Macarıstan 1 0 1 0 3-3 1
Yunanıstan 1 0 1 0 1-1 1
Rusiya 3 0 1 2 2-6 1
Almaniya 1 0 0 1 1-4 0
Serbiya 1 0 0 1 0-4 0
Polşa 1 0 0 1 0-2 0

KƏNAN BAHADIR