Klublar topları PFL-dən pulsuz almaq istəyirmiş… - AÇIQLAMALAR
Əvvəlki iki mövsümdə PFL klubları topla pulsuz təmin edib.
Yeni “futbol ili”ndə isə belə olmayacaq. Belə ki, qurum premyer-liqada mübarizə aparacaq komandalara “Adidas” şirkətinin istehsal etdiyi topları müəyyən məbləğ qarşılığında verir. Yəni PFL klubların hər birinin qiyməti 230 manatdan başlayan 500-100 arası top almasını istəyir. Bu isə heç də birmənalı qarşılanmayıb. Məsələnin ciddiliyini nəzərə alıb klubların mövqeyini öyrəndik. Yalnız “Neftçi” ilə “Sumqayıt”dan sorğumuza cavab verilmədi.
Eldəniz Yusubov (Araz-Naxçıvan): "
PFL-in bu addımını alqışlayırıq. Klublar özləri top alsaydı, bunun xərci daha çox çıxacaqdı. Düzdü, əvvəlki illərdə toplar klublara pulsuz paylanılırdı. Amma indiki məqamda bu prosesin yolxərci, gömrük rüsumu var. Mən bu məsələni araşdırmışam. İşin belə olması bizim üçün çox rahatdı".
Nail Kərimov (Qəbələ):
"Toplar əvvəlki mövsümlərdəki kimi pulsuz paylanılsaydı, daha yaxşı olardı. Bununla bağlı Aslan müəllimlə söhbətimiz olub. Lakin PFL-in bu addımına hörmətlə yanaşırıq".
Rəşad Məmmədov (Səbail): "
Təbii ki, topların pulsuz olmasına heç kim etiraz etməz. Çünki artıq pul cibimizi yırtmır. Amma mövcud vəziyyət və reallıq bunu tələb edirsə, “Səbail” klubu olaraq, heç bir etirazımız yoxdu. Çempionatın vahid toplarla oynanılması vacib məsələlərdən biridi və bunu pərakəndə şəkildə alsaydıq, təbii ki, bizə baha başa gələcəkdi. PFL-ə təşəkkür edirik ki, bunu təşkilatlanmış formada həyata keçirir".
Azad Mustafayev (Kəpəz):
"Neçə illərdi öyrəşmişik ki, toplar pulsuz verilir. Birdən-birə pulla satılması xüsusilə də bizim kimi kasıb, hər manatı önəmli olan klub üçün çətindi. Amma belə qərar verilibsə, daha nə edə bilərik?! Çempionatda iştirak ediriksə, hamı kimi o toplardan istifadə etməli və almalıyıq. Nə qədər çətin olsa da, ödəniş edəcəyik".
Elvar Quliyev (Qarabağ):
"Klub olaraq bu barədə nəsə deyə bilmərik. Bu, yarışları təşkil edən PFL-in fikridi. Əvvəlki iki mövsümdə topları bizə pulsuz təqdim edirdilər. İndi o pulu ödəməkdən başqa yolumuz yoxdu".
Süleyman Tağıyev (Turan Tovuz):
"Bizdən olsa, topların pulsuz verilməsini istəyirik. Amma bu qərarı yarışları təşkil edən PFL verib. Buna da hörmətlə yanaşırıq".
İqor Ponomaryov (Sabah):
"Əvvəlki mövsümlərdə topları pulsuz əldə etmişik. Belə olsaydı, bizim üçün də yaxşı olardı. Amma belə qərar verilibsə, biz də buna uyğun hərəkət etməliyik".
Elmar Abdullazadə (Zirə):
"Bununla bağlı xüsusi fikrimiz yoxdu. Qərar verilib, biz də buna uyğun addım atmışıq".
CAVİD ƏLİYEV
Digər xəbərlər
