“Bir neçə ildi ki, UEFA-nın təşkilatçılığı ilə aşağı yaş qruplarından ibarət milli komandalar üçün İnkişaf turniri keçirilir. Həmin yarışların əsasnaməsinə görə komandaların sifariş ərizəsinə daxil olan bütün futbolçular turnir ərzində minimum 90 dəqiqə meydanda olmalıdı. Bəli, yığmamızın iştirak etdiyi son İnkişaf turnirində məşqçilər tərəfindən texniki səhvə yol verilib və heyətdəki futbolçuların hamısı 90 dəqiqə oynamayıb. Bu üzdən UEFA-dan elektron poçt vasitəsilə AFFA-ya tövsiyə xarakterli xəbərdarlıq məktubu göndərilib. Məktubda növbəti turnirlərdə əsasnamənin müvafiq bəndinə əməl olunmasının, heyətdəki bütün futbolçulara ən azı 90 dəqiqə oynamaq şansının verilməsinin vacibliyi vurğulanıb. Lakin komandamıza qadağa qoyulması haqda xəbərlər həqiqəti əks etdirmir. Ümumiyyətlə, heç bir yığmamız üçün qadağa yoxdu”.

“Mən sözügedən əsasnamə ilə tanış olmuşam. Elə bir məcburiyyət yoxdu. Amma tövsiyə olunur ki, bütün futbolçular turnir ərzində 90 dəqiqə meydanda olsun. Bilindiyi kimi, UEFA 18 futbolçunun yarışda iştirakı üçün vəsait ayırır. Biz isə 22 oyunçudan ibarət heyətlə getmişdik. Biri məşqlər zamanı zədələndiyindən 21 nəfərlə yolumuza davam etdik. Qeyd edim ki, 4 nəfərin maddi dəstəyi AFFA tərəfindən təmin olunmuşdu. Ümumilikdə çalışdım ki, bütün futbolçulara şans verim. Hətta bir matçda uduzmaq bahasına əvəzetmələr etdim ki, hər kəs bu təcrübədən faydalansın. 21 futbolçunun hər birinin 90 dəqiqə meydanda olması çətindi. Bu üzdən həmin tövsiyəyə riayət edə bilmədik. Yeri gəlmişkən, bir məsələni fürsətdən istifadə edərək ictimaiyyətin nəzərinə çatdırım. Mətbuatda İnkişaf turnirində guya rəqibin baş məşqçisini təhqir etdiyim və dalaşdığım haqda xəbərlər oxudum. Cəfəngiyyatdı. Əksinə, rəqibi qələbə qazandığına görə təbrik etdim, qarşı tərəf də məni mübariz oyun sərgilədiyimizə görə. Yaxşı olar ki, jurnalistlər belə mövzuları işıqlandırmamış aidiyyatı şəxslərlə əlaqə saxlayıb doğru olub-olmadığını aydınlaşdırsın. Böhtanla qarşılaşmaq mənə pis təsir edir”.