"Çinar-Zəngilan"ın baş məşqçisi Anar Dünyamalıyevlə əlaqə saxladıq: "Yarandığımız gündən əsas məqsəd adımıza layiq oyunla peşəkarlaşmaqdı. Region Liqasında 42 komanda arasında 2-ci yeri tutmağımız da buna sübutdu. Yetirmələrim mövsümboyu çox əziyyət çəkərək gərgin oyunlar keçirdilər. Gözləyirdik ki, heç olmasa, 2-ci diviziona gətirilək. Amma bizi layiq bilmədilər. Məcbur qalıb komandanın fəaliyyətini hələlik dondurduq. AFFA-nın baş katibi Sərxan müəllim sağ olsun, ardından bizi qəbul edib dərdimizi dinləyəcəyinə söz verdi. İyulun 4-də onunla görüşümüz olacaq. İnanıram ki, "Çinar-Zəngilan"la bağlı ədalətli qərar veriləcək. Hazırda bütün futbolçularımız AFFA-nın qərarını gözləyir. 2-ci divizionda çıxışımıza icazə verilsə, heyətimizi qorumaqla yanaşı, bir neçə transfer də həyata keçirəcəyik. Yox, icazə verilməsə, uşaqlar çıxıb gedəcək. "Kür-Araz"ın hansısa səbəblərə görə turnirdən çıxarılacağı, onun yerinə gətiriləcəyimiz haqda heç bir məlumatım yoxdu, ilk dəfə sizdən eşidirəm. Hansısa komandanın faciəsi üzərində uğur qazanmaq kimi niyyətimiz yoxdu. Peşəkar liqada çıxış etməyə layiqik və haqqımızdı. Ən azı Region Liqasının gümüş medallarını qazanmağımız buna dəlalət edir".