İki ildi çempionatda uğursuzluqla üzləşən “Sumqayıt” hələ ki iritirə-itirə gedir. Əksər futbolçuları ilə vidalaşan “kimyaçılar”ın bu günə qədər yeganə transferi “Zirə”dən ayrılan Mehdi Cənnətovdu. O Mehdi ki, artıq bir dəfə “Sumqayıt”la yolları kəsişib. Bir az artıq pul təklif olunan kimi komandanı tərk edərək Bakıətrafı qəsəbə təmsilçisinə yollanmağı lazım bilib. Bu gün isə “qartallar”ın xidmətindən imtina etdiyi Cənnətov başqa seçimi qalmayınca yenidən “Sumqayıt”a qayıtmaq məcburiyyətindədi.

Absurd bilirsiz nədi? “Sumqayıt”ın hazırda qapıçılar üzrə məşqçisi yoxdu. Rəhbərlik qapıçı məşqçisi olmadan, yəni onunla razılaşdırılmadan komandaya qapıçı dəvət edir. Bəlkə bu posta təyinat alacaq mütəxəssis Mehdinin düşərgəyə dəvət olunmasına ağız büzəcək, onunla işləmək istəməyəcək? Onda necə olacaq? Bəlkə rəhbərlik, baş məşqçi yeni qapıçılar üzrə məşqçi ilə anlaşıb və onunla məsləhətləşəndən sonra Cənnətova dəvət göndərib. Belədisə, niyə klub saytı bu barədə ictimaiyyətə məlumat vermir, nədən çəkinir?

Yeni oyunçulara gəlincə, başa çatan mövsümdə adından az-çox söz etdirən yerli futbolçular artıq yeni mövsümə hansı klubda başalayacağını dəqiqləşdirib. Son günlər bu yöndə xəbərlər aşıb-daşır. Ancaq onların arasında bir nəfərin belə adı “Sumqayıt”la yanaşı hallanmır. Rəhbərlik nəyi gözləyir, nəyə ümid edir? Yenə çempionatın startı ərəfəsində klubsuz qalanlara qucaq açan “Sumqayıt” görəcəyik? Yenə “biz istədiklərimizin klubla müqaviləsi var” bəhanələri qulağımızı dəng edəcək? Bəylər, unutmayın ki, ucuz ətin şorbası olmur. Ya böyümək üçün pul xərcləyəcəksən, ya da heç kimə lazım olmayan futbolçularla anlaşıb çempionatda ilan kimi sürünəcəksən.

Ötən yay ilk dəfə “Sumqayıt”a əcnəbi transfer etməyə icazə verildi. Kaş ki, verilməyəydi. Yerlilərlə iki dəfə avrokuboklara vəsiqə qazanan, tarixində ilk dəfə bürünc medalları boynundan asan, iki dəfə ölkə kubokun finalına yüksələn komanda legionerlərin gəlişi ilə batmağa başladı. Nə yay, nə də qış fasiləsində düşərgəyə qoşulan legionerlər komandaya fayda verdi. Bu dəfə necə olacaq?

Nə qədər ki, video-çarxla futbolçu seçiləcək, eyni hal davam edəcək. Rəhbərliyin, məşqçilər korpusunun başı hələ tanış menecerlərin təklif etdiyi futbolçuların videolarına baxmağa qarışıb. Bir də onda oynacaqlar ki, lələ köçüb, yurdu qalıb. Premyer-liqanın digər təmsilçiləri heyəti də komplektləşdirib, təlim-məşq toplanışını da başa vurub çempionatın startını gözləyir. Onda isə gec olacaq. Atalar demişkən, daldan atılan daş topuğa dəyər. Samir Abasov hər turdan sonra rəqib baş məşqçini təbrik etmək, Riad Rəfiyev fəxri lojanı əsəbi tərk etmək, idman direktoru Faiq Hacı-Məhərrəmov üzüntü içində olmaq istəmirsə, günü sabahdan əməli addım atmalı, heyəti gücləndirmək üçün hərəkətə keçməlidi. Onunla-bununla boş-boşuna danışıq aparıb vaxt itirməyin zamanı deyil.

RƏŞAD