La Liqada Çempionlar Liqasına və ya ən azı avrokuboklara vəsiqə uğrunda mübarizə aparan “Betis” kapitanını futboldan təntənəli şəkildə yola salmaq fikrindədi.

"Football-plus.az" xəbər verir ki, Xoakin Sançes bir ay əvvəl mövsüm başa çatandan sonra karyerasını bitirəcəyini elan edib.

Vinger yaşıl-ağ formada 14-cü mövsümünü keçirir. İndiyə qədər La Liqada 617 oyun keçirən Xoakin bu göstəricidə yalnız “Barselona”nın sabiq qolkiperi Andoni Subisarettaya (622) uduzur. İspaniya çempionatında sona hələ 5 tur var. Yəni Manuel Pelleqrini şans verərsə, Xoakin rekordçuya çata bilər.

Xoakinin xeyriyyə xarakterli vida oyunu La Liqanın cari mövsümü başa çatandan iki gün sonra – iyunun 6-da “Betis”in ev oyunlarını keçirdiyi “Benito Vilyamarin” stadionunda olacaq. Biletin qiyməti böyüklər üçün 20, kiçiklər üçün 10 avro təşkil edəcək. Klub üzvləri və abonoment sahibləri stadiona havayı keçmək hüququna sahibdi.

Biletlərin qalan hissəsi isə azad satışda olacaq. Bilet satışından əldə olunan vəsait 41 yaşlı futbolçunun uşaqlarda onkoloji xəstəliklərlə mübarizə aparan xeyriyyə fondunun hesabına köçürüləcək.

Bu oyunda Xoakinin 23 illik karyerası boyunca komanda yoldaşı olan futbolçuların iştirakı gözlənilir.