Heç şübhəsiz, Erlinq Holannı cari mövsümün ən uğurlu transferi adlandırmaq olar.

"Football-plus.az" xəbər verir ki, ötən yay Dortmund “Borussiya”sından “Mançester Siti”yə keçən və bir çox rekordları alt-üst edən norveçli qoleador “Bavariya”nın dünən ÇL-də mübarizəni dayandırmasında da az rol oynamadı. Maraqlıdı ki, ötən yaya qədər onu heyətinə qatmaq istəyən klubların başında məhz elə “Bavariya” gəlirdi. Bəs bu transfer niyə baş tutmadı?

Münhen nəhəngi Əli aşından da oldu, Vəli aşından da...
Erlinqin 2,5 il Dortmund “Borussiya”sında oynadığını və orda da məhsuldarlıq baxımından xarüqələr yaratdığını nəzərə alsaq, adının “Bavariya” ilə hallanmaması qəribə olardı. Çünki Münhen nəhəngi son illərdə dəfələrlə “Borussiya”nın ulduzlarını özünə cəlb etməyi bacarıb. Amma nədənsə Holannın keçidini həll etmək mümkün olmadı. Təxminən 2 il öncə münhenlilərin bu futbolçuya maraq göstərməsi haqda xəbərlər ilk dəfə peyda olanda Karl-Haynts Rummenigge buna belə reaksiya vermişdi: “Bu xəbərlər hardan çıxır? Bu mövzu haqda heç nə bilmirəm. Yalnız onu deyə bilərəm ki, heyətimizdə Levandovski kimi dünyanın ən yaxşı mərkəz hücumçusu oynayır”.

2022-ci ilin yazında, yəni düz bir il əvvəl isə bu artıq Almaniyada ən çox müzakirə olunan mövzuya çevrilmişdi. Çünki Levandovskinin də “Bavariya”nın Holanna maraq göstərməsindən xəbəri var idi. Məşhur polşalı forvard Münhen klubundan incidiyi üçün menecerinə “Barselona” ilə danışıqlara başlamaq tapşırığı vermişdi. “Skay Sport” iddia edirdi ki, “Bavariya”nı ən çox düşündürən işin maliyyə tərəfi idi. Holannın transferi kluba çox böyük pullar bahasına başa gələcəkdi. Bununla belə, danışıqlar davam edirdi. “Bild”in versiyasına görə idman direktoru Hasan Salihamiciç evində Holannla görüşübmüş. Hətta norveçlinin bir neçə gün Münhendə yaşadığı da iddia olunmuşdu. Məsələni mümkün qədər uzatmağa çalışan “Bavariya” sonda, necə deyərər, Əli aşından da oldu, Vəli aşından da. Çünki həm Holann “Siti”yə qismət oldu, həm də Levandovski əldən çıxdı. Erlinqin Mançesterə yollanmasından bir müddət sonra Salihamiciç onunla görüşdüyünü etiraf etdi: “Bəli, onunla bir neçə dəfə söhbətimiz oldu və bu, sirr deyil. Bütün mümkün variantları müzakirə etdik. Amma sonda müxtəlif səbəblərə görə bu transferi bitirə bilmədik. Oyunçunu günahlandırmaq istəmirəm. O özü üçün düzgün fikirləşdiyi varianta üstünlük verdi”.

“Orda yazılan məbləği görəndə huşumu itirdim”
“Bavariya” ilə “Siti” arasındakı cavab oyunundan öncə “Kikker” bu olayı yenidən qabardaraq transferin baş tutmamasına aid yeni detallar açıqlayıb. Sən demə, söhbət 35 milyon avroluq illik maaşdan gedirmiş! Münhen klubunun rəhbərliyi Holanna məhz bu məbləği təklif etmək barədə ciddi düşünürmüş. Amma müqavilənin 5 illik müddətə nəzərdə tutulduğunu, üstəlik “Bavariya”nın “Borussiya”ya ən azı 75 milyon avro təzminat ödəməli olacağını nəzərə alanda, Holannın transferi kluba ümumilikdə 250 milyon avroya yaxın bir məbləğə başa gələcəkdi! Bu isə nə bundesliqa, nə də “Bavariya” üçün normal sayılacaqdı. Çünki Almaniya futbolunda bir oyunçuya bu cür pullar xərcləmirlər! İngiltərə mənbələrinin yazdığına görə, Holannın “Siti”də illik maaşı 22,5 milyon avrodu. “Bavariya”nın idarə heyətinin sədri Oliver Kan martın əvvəllərində “Ekip”ə verdiyi müsahibədə dolayı yolla da olsa, Holannın transferi qarşısındakı əsas maneənin məhz pul olduğunu etiraf etdi: “Bonusları və maaşı nəzərə aldıqda ümumilikdə bu keçid bizə çox baha başa gələcəkdi. Bizim öz fəlsəfəmiz var: nə qədər qazanırıqsa, o qədər də xərcləyirik. Bir futbolçuya böyük sərmayə qoymaq həmişə çox ciddi bir riskə girmək deməkdi. Biz klubun maliyyə sabitliyini təhlükə altına ata biləcək addımlardan həmişə çəkinirik. “Bavariya”nın borcu olmamalıdı və bu prinsipimizdən vaz keçməyəcəyik! Uzaq gələcək üçün bu durum hətta bizə əlavə üstünlüklər verir”. Dortmundluların baş məsləhətçisi vəzifəsini icra edən Mattias Zammerin isə bu məsələyə reaksiyası çox maraqlı alınmışdı: “Holann ilə “Bavariya” arasındakı transferdə qeyd olunan məbləği görəndə huşumu itirdim. Həyat yoldaşım məni silkələyərək ayıltdı. Məbləğ o qədər böyük idi ki, sayıb qutara bilmədim”. Holann özü isə bütün bu həngamədə ən çox Levandovskiyə görə üzgün idi: “Bavariya”nın mənimlə maraqlandığını ilk dəfə eşidəndə buna təəccübləndim. Axı onların Levandovski kimi oyunçusu var idi. Onun nə qədər qol vurduğunu və kluba nə qədər titul qazandırdığını bilmirəm. Amma Levanın yerinə çox üzüldüm. Çünki klubdan özünə qarşı layiq olduğu hörməti görmürdü. Digər tərəfdən bu vəziyyət onun yeni klub axtarmasına təkan verdi”.

Zaman göstərdi ki, “Bavariya” müasir futbolla ayaqlaşmamaqla və Holanna astronomik məbləğ xərcləməkdən imtina etməklə uduzan tərəf oldu! Erlinq bu dueldə “Siti”nin yox, “Bavariya”nın heyətində olsaydı, kim bilir, bəlkə də yarımfinalda “Real”ın rəqibi məhz münhenlilər olardı...

ƏLİ RAUFOĞLU