2022-ci ilin iyunun 24-də “Qalatasaray”ın “sükanı arxasına” keçən və o vaxtdan bəri saysız-hesabsız rekordların müəllifi olan Okan Buruk dünən daha bir göstəricidə rəsmən adını klub tarixinə yazdırdı.

"Football-plus.az" xəbər verir ki, o, “Qalatasaray”ın başında 1481-ci gününü tamamladı. Buna qədər “Cim-Bom”un başında fasiləsiz olaraq ən uzun müddət çalışan mütəxəssis Fatih Terim idi. Amma burda söhbət Terimin birinci yox, sonuncu dönəmindən gedir. “İmperator” 2017-ci il dekabrın 22-də 4-cü dəfə “sarı-qırmızılar”ın başına keçmiş və 1480 gün vəzifədə qalaraq 2022-ci il yanvarın 10-da o dönəmki prezident Burak Elmas tərəfindən istefaya göndərilmişdi. Buruk artıq bu göstəricidə klubun yeni rekordçusudu və bundan sonra vəzifədə olduğu hər ötən gün göstəricisini daha da yaxşılaşdıracaq.

Təbii ki, 53 yaşlı mütəxəssisin qarşıdakı mövsüm üçün əsas hədəfi ardıcıl 5-ci çempionluğu qazanmaqla tarixə düşməkdi. O, bunu bacarsa, bu göstəricidə də Terimi geridə qoyaraq yeni rekordçu olacaq. Terim 1996-2000-ci illərdə “Qalatasaray”la ardıcıl 4 il çempion olub. Türkiyə futbolunda heç bir klub və heç bir məşqçi ardıcıl 5 il çempionluq sevinci yaşamayıb.

Maraq üçün bildirək ki, Okan Buruk indiyə qədər “Qalatasaray”da 6 titul qazanıb. Ardıcıl 4 çempionluqdan başqa, o, ölkə kuboku və ölkə superkubokunu da əldə edib. Bu 1481 gün ərzində “Qalatasaray” Burukla keçirdiyi 203 rəsmi oyundan 144 qələbə, 28 heç-heçə, 31 məğlubiyyətlə ayrılıb. Komanda 457 qol vurduğu halda, öz qapısından 212 top buraxıb. Okan Buruk həm də futbolçu və məşqçi kimi Türkiyədə ən çox (12) çempionluq yaşamış futbol adamıdı. Onun futbolçu kimi 7, məşqçi kimi 5 çempionluğu var.

Bundan başqa, Buruk “Qalatasaray”ın başında Türkiyə çempionatının xal (2023/24, 102), ardıcıl qələbə (2023/24, 17) və səfərdə ardıcıl qələbə (2024-25-ci illərdə, 17) rekordlarını da yeniləyib. O eyni zamanda superliqa tarixində səfərdə 50 qələbə həddinə ən tez (64-cü oyunda) və bir komandanın başında 75 qələbə həddinə ən tez (“Qalatasaray”la 90-cı oyunda) çatan məşqçidi.