“Lazım olarsa, baş məşqçi Rəşad Sadıqov bu barədə futbolçulara məlumat verəcək” - gürcü azarkeşlər “qartallar”ı necə qarşılayacaq?
Ölkəmizi Konfrans Liqasında təmsil edən “Zirə” ilk oyunda evdə inamlı qələbə qazanmaqla, demək olar ki, növbəti mərhələyə adladı. Bununla belə, irəlidə “Torpedo” ilə cavab oyunu da var. Heç şübhəsiz, Kutaisidə - Ramaz Şengeliyanın adını daşıyan 14700 yerlik stadionda “Zirə”ni “isti” qarşılanma gözləyir. Gürcü azarkeşlər Azərbaycan klublarına məğlubiyyəti heç cür qəbul etmir, narazılığını ən çılğın şəkildə bildirir ki, Sumqayıtdakı oyunun sonunda da eyni mənzərəni gördük. 20 gürcü azarkeş darmadağın olan “Topredo”nun oyunçularını fitə basdı və söydü.
Bəs cavab görüşündə vəziyyət necə olacaq? Gürcü azarkeşlərin davranışı baxımından narahatlıq üçün əsas varmı? “Zirə”nin futbolçularına mümkün münaqişədən qaçmaqla bağlı hansısa təlimat verilibmi? “Qartallar” növbəti mərhələyə adlayarsa, matçlarını Mehdi Hüseynzadə adına stadionnda keçirməsi mümkündü?
Bu suallara cavab tapmaq üçün klubun mətbuat katibi Elmar Abdullazadə ilə əlaqə saxladıq:
“Gürcü azarkeşlər və futbolçular ilə bağlı məsələ klubdaxili mövzudu. Lazım olarsa, baş məşqçi Rəşad Sadıqov bu barədə futbolçulara məlumat verəcək. “Mehdi Hüseynzadə” variantına gəlincə, növbəti mərhələyə vəsiqə qazanandan sonra matçları harada keçirəcəyimiz ilə bağlı nəsə deyə biləcəyik”.
İSRAYIL XEYRULLAYEV
Digər xəbərlər
