“Vaşinqton”un hücumçusu Aleksandr Oveçkin onun Floridadakı evinə su axıdan amerikalı qonşusu ilə məhkəmədə barışıb. Bu haqda xəbəri SHOT “teleqram” kanalı yayıb.

"Football-plus.az" xəbər verir ki, rusiyalı hokkeyçi 2016-cı ildə 1,9 milyon dollar ödəməklə Sanni-Ayls-Biç şəhərindəki Jade Beach kondominiumunda elit mülk alıb.

Oveçkin orda müntəzəm yaşamayıb, sadəcə, yaydan-yaya istirahət etməyə gedib. 2019-cu ildə Oveçkinin 20-ci mərtəbədəki qonşusu lavabo drenajını düzgün birləşdirmədiyindən mənzili su basıb. Nəticədə mənzildə mebel sıradan çıxıb. Məhkəmədə 30 min dollarlıq iddia qaldıran rusiyalı hokkeyçi mənzilini aylıq 10,5 min dollar müqabilində kirayə verib. “Vaşinqton”un oyunçusu daim məşğul olduğuna görə məhkəmə iclaslarında iştirak edə bilməyib. Üç il sürən çəkişmədən sonra, nəhayət, tərəflər məhkəmədə barışıq müqaviləsi bağlayıb.

Bu arada Oveçkinlə bağlı daha bir maraqlı xəbər yayılıb. Belə ki, “Vaşinqton”un kapitanı yuxarıda adını çəkdiyimiz Jade Beach kondominiumunda 2,1 milyon dollarlıq daha bir mənzil alıb. Amma bu dəfə 40-cı mərtəbədə. 222 kvadrat metrlik mənzil “Porsche Design Tower” göydələnini yaxınlığında yerləşir. Argentina yığmasının hücumçusu Lionel Messi də yaxınlarda həmin göydələnə köçüb.