Robert Levandovski ilə keçmiş agenti Sezari Kuharski arasındakı münasibətlər əməlli-başlı pisləşib. Polşada onların iştirakıyla məhkəmə prosesinə start verilib.

Football-plus.az xəbər verir ki, Kuharski “Barselona”nın hücumçusunu şərikli şirkətə məxsus pulları tərəfdaşının razılığı olmadan özünün və həyat yoldaşı Annanın şəxsi hesabına köçürməkdə ittiham edir.

Məşhur futbolçu isə keçmiş menecerini onu şantaj etməkdə günahlandırır. Levandovski buna sübut kimi Kuharski ilə telefon danışıqlarının yazısını məhkəməyə təqdim edib. Futbolçu 2018-ci ilin fevralından 2020-ci ilin yanvarına qədərki müddətdə baş tutan üç danışığı əsaslı dəlil kimi göstərib. Amma Kuharski həmin yazıların sonradan redaktə olunduğunu iddia edib.

Tərəflər arasındakı mübahisə artıq bir neçə ildi davam edir. Futbolçu ilə menecer məsələni öz aralarında yoluna qoymaq üçün bir neçə görüş keçirsələr də, heç cür razılığa gələ bilməyiblər. Xatırladaq ki, Kuharski 2010-18-ci illərdə Levandovskinin agenti olub. İndi futbolçunun maraqlarını Pini Zahavi təmsil edir.