Müdafiəçi Xulian Arauxonun “Los Anceles Qalaksi”dən “Barselona”ya keçidinin baş tutmadığını xəbər vermişdik.

Transfer FİFA tərəfindən qeydə alınmamışdı. Yanvarın son günlərində tərəflərin keçid şərtləri ilə bağlı razılığa gəldiyi bildirilmişdi. 21 yaşlı futbolçunun “Barselona” ilə müqaviləsinin müddəti 2026-cı ilin iyununa kimi hesablanmışdı. Lakin sistemdəki problem səbəbindən keçid nəzərdə tutulan transfer dövründə reallaşmamışdı. Müqaviləni rəsmiləşdirməyə yalnız 18 saniyə gecikən İspaniya klubu FİFA-dan güzəşt əldə etməyə çalışsa da, ali futbol qurumundan mənfi cavab almışdı. Amma “Barselona” rəhbərliyi FİFA-nın transferin qüvvədə olan qaydalara uyğun olaraq tamamlanmamasıyla bağlı mövqeyi ilə razılaşmayıb.

Football-plus.az xəbər verir ki, bu səbəbdən İdman Arbitraj Məhkəməsinə müraciət edilib.