PFL rəsmisi “Kəpəz”in Gəncədə oynamağı haqq etdiyini düşünür
Uzun müddətdən sonra böyük futbol yenidən Gəncəyə qayıtdı.
Amma “Neftçi”ylə matçdan sonra çoxları haqlı olaraq etiraz səsini ucaltdı. Çünki stadionda ciddi problemlər “göz oxşayır”.
Maraqlıdı, PFL bu qədər çatışmazlığa niyə göz yumub? “Kəpəz”ə ev ounlarını bu stadionda keçirməyə icazə verilməsinin kökündə nə durur? Sualları PFL-in texniki-idman direktoru Elgiz Abbasova ünvanladıq: “Həm Gəncə şəhər stadionunun, həm də “Kəpəz”in Azərbaycan futbol tarixində xüsusi yeri var. Biz müəyyən işlər görüləndən sonra oyunların orda keçirilməsinə icazə verdik. Paltardəyişmə, hakimlər, mətbuat konfransı otağı və tribunaların hazır vəziyyətə gətirilməsi üçün işlər görüldü. Şəxsən mən də stadionu təftiş edirdim. Ora 4 dəfə baxış keçirdik. Hər dəfə də yeni tapşırıqlar verilib. Bəlkə də detallardan tam məlumatınız yoxdu, amma deyə bilərik ki, adi işıq xəttindən tutmuş, stadiondakı banerlərə qədər hər şey diqqətdə saxlanılıb, incələnib. Yəni müraciətdən dərhal sonra komandaya bu stadionda oynamağa icazə verilməyib. Bu yalnız bir müddət incələmələr aparıldıqdan, işlər görüldükdən sonra mümkün oldu və PFL tərəfindən qərar verildi. Bəli, razıyam ki, tam hazır vəziyyətdə deyil. Amma minimal şərtlər var ki, stadion ona cavab verir. Bəzi problemlər bizim tapşırıqlarımızdan sonra klub tərəfindən aradan qaldırıldı. Amma hələ də çatışmazlıqlar var və biz bununla bağlı klubla işləyirik. Çalışırıq ki, gündəmdə olan problemlərin çoxunu aradan qaldıraq. Burda bizdən asılı olmayan məqamlar da var. Məsələn, tribunaların sökülüb yenidən tikilməsinə biz də söz verə bilmərik. Amma ümumilikdə işlər görülüb və görülür. Hər detal diqqətdə saxlanılır. Çalışırıq ki, ora gələn komandalar, hakimlər və jurnalistlər minimal rahatlıqla əhatə olunsunlar. Çatışmazlıqları bilirik. Amma “Kəpəz” oyunlarını Gəncədə keçirməyi haqq edir”.
ŞAİR ABDULLA
Digər xəbərlər
