“Sumqayıt-2”nin baş məşqçisi olan, ötən mövsüm klubun futbol akademiyasında əlaqələndirici kimi çalışan Zaur Hidayətov yeni vəzifəyə təyinat alıb.

45 yaşlı mütəxəssis bundan sonra əsas komandanın skautu funksiyasını yerinə yetirəcək. Yeri gəlmişkən onu da qeyd edək ki, bu vaxta kimi “kimyaçılar”da skaut ştatı rəsmən olmayıb. Zaur bəylə söhbətdə təyinatı barədə danışıb, bizi maraqlandıran başqa suallara cavab tapmağa çalışdıq.

- Əvəzedici heyətin baş məşqçisi olmuşam, ötən mövsüm akademiyada əlaqələndirici kimi çalışmışam. Bu yay isə rəhbərlik tərəfindən əsas komandanın skautu olmaq təklif olundu. Mənə etimad göstərdiyinə görə klub prezidenti Riad Rəfiyevə təşəkkür edirəm. Bəlkə də bu sahə kənardan kiməsə rahat görünə bilər. Ancaq skaut kimi çalışmaq çox məsuliyyətli işdi. Xüsusilə də “Sumqayıt” kimi klubda. Bəlkə də büdcəsi geniş olan klublarda transferlərdə hardasa yanlışlığa yol vermək mümkündü. Bir futbolçu özünü göstərə bilmirsə, onun əvəzinə başqasını dəvət etmək mümkündü. Ancaq bizdə elədi ki, səhvə yol versən, həm azarkeşlər səni qınayacaq, həm də klubun pulu havaya sovrulacaq. Odu ki, atalar demişkən, yüz ölçüb, bir biçməlisən.

- “Zirə”nin baş məşqçisi Rəşad Sadıqov açıqlamasında əvvəlki illərlə müqayisədə bu yay legionerlərin daha çox məvacib tələb etdiyini bildirib. Bu nədən qaynaqlanır?

- Rəşad müəllimin fikri ilə tam razıyam. İşimlə əlaqədar Avropada olan agentlərlə tez-tez danışıram. Onlar da eyni sözləri deyir. Məsələn, Serbiya “Voyvodina”sında çıxış edən iki futbolçu ilə maraqlanırdım. Tanış agent vasitəsi ilə onlar haqda məlumat əldə etməyə çalışdım. Bildirdilər ki, ötən mövsüm 3-4 min avro maaş alırdılarsa, indi ölkələrində məvacibləri 7-8 min avrodu. Sizcə, evində bu qədər maaş alan futbolçu Azərbaycana 5-6 minə gələr? Təbii ki, legioner kimi daha çox məvacib istəyəcək. Ümumiyyətlə, hazırda “transfer bazarı”nda qiymətlər artıb. Dünya iqtisadiyyatında gedən inflyasiya futbola da təsir göstərib. Bəzən elə olur ki, qiymətdə razılaşırsan, ancaq futbolçunu Azərbaycana gəlməyə razı sala bilmirsən.

- “Sumqayıt”da yeni transferlər olacaq?

- Baş məşqçimizin istəyinə uyğun forvard tapmağa çalışırıq. Bu yöndə axtarışımız davam edir. Elə hücumçu istəyirik ki, həm büdcəmizə, həm də baş məşqçinin futbol fəlsəfəsinə uyğun olsun. Yenə deyirəm, seçimdə səhv etmək istəmirik. İstəmirik ki, kənardan “ilk dəfə kluba legioner transfer etmək icazəsi verildi, gətirdikləri futbolçular heç nəyə yaramır” desinlər. Bir də bizə qapıçı lazımdı. Bu mövqe üçün də axtarışlarımız davam edir. Ancaq bu gün üçün prioritet forvarddı.

RƏŞAD