“Kəpəz” Mərdəkanı niyə Qəbələyə dəyişdi?
Misli premyer-liqasında iki tur arxada qalıb.
"Football-plus.az" xəbər verir ki, uzun müddət sonra ölkə çempionatının yüksək dəstəsinə dönən "Kəpəz" hələ ki doğma meydanda oyuna çıxa bilməyib. Buna səbəb Gəncə şəhər stadionunun tribunalarının qəzalı vəziyyətdə olmasıdı. Bu üzdən komanda ilk ev oyununu Bakıda - "Dalğa Arena"da keçirdi. Lakin PFL növbəti matçların Qəbələdə baş tutacağını açıqladı.
Bu variant varkən komandanın ilk oyua Mərdəkanda çıxması maraq doğurmaya bilməz. “Zirə” ilə ev görüşünü də Qəbələdə keçirmək olmazdı?
Ümumiyyətlə, bu məsələ niyə sonradan gündəmə gəldi? Suallara "Kəpəz"in mətbuat katibi Azad Mustafayevlə söhbətdə aydınlıq gətirdik: "Stadionla bağlı problemimiz ilk turun oyununa bir neçə gün qalmış məlum oldu. Seçim etməyə vaxtımız olmadı. Bu üzdən yardım üçün AFFA-ya müraciət etdik. Federasiya tərəfindən kömək olundu. Ev oyunlarımızı keçirmək üçün “Dalğa Arena” xidmətimizə verildi. Lakin Bakı Gəncədən çox uzaqdı. Bir oyun üçün 400 km məsafə gəlmək heç də az deyil. Hələ bunun geri qayıtmağı da var. Qəbələ isə daha yaxındı. Səhv etmirəmsə, 200 km məsafə var. Ora ev oyunlarımız üçün daha əlverişlidi. Tovuz variantı da var idi. Müraciət etsək də, müsbət cavab gəlmədi. Onları da başa düşmək lazımdı, bizim kimi premyer-liqaya yüksəliblər. Yəqin ki, imkan olmayıb deyə bu cavabı veriblər. Ən sonda “Qəbələ”yə müraciət etdik. Sağ olsun klub rəhbərliyi, müraciəti müsbət cavabladı. PFL-in açıqlamasında da var ki, növbəti qərara qədər ev oyunlarımız Qəbələdə keçiriləcək. Lakin klub rəhbərliyi bu yöndə çalışmaları davam etdirir. Məqsədimiz odu ki, “Kəpəz” ev matçlarını Gəncədə keçirsin, doğma meydanda oynasın. Ümid edirik ki, yaxın zamanda bu məsələ həllini tapacaq".
İSMAYIL XEYRULLAYEV
Digər xəbərlər
