Bakı, 20 iyul, səhər saat 7, Heydər Əliyev adına Beynəlxalq Hava Limanı.

Ölkə xaricinə yollanıram. Səfərim Cənubi Kiprədi. İndi çoxunuz fikirlərsiz ki, yay aylarında bu ölkədə istirahət əla olardı. Amma elə deyil. Yox, söhbət istirahətdən getmir. Cənubi Kiprə yollanmağımın səbəbkarı “Neftçi”di. Flaqman bu gün Larnakada “Aris”lə qarşılaşacaq. Həmişəki kimi “Neftçi”nin dəvəti ilə “Futbol+” əməkdaşı olaraq görüşü yerindən izləmək şansına sahib olmaq gözəl hissdi. Bir az da həyəcanlıyam. Çünki ötən mövsüm bu klubla sonuncu səfərim Aralıq dənizi sahillərində yerləşən Hayfaya olmuşdu. İndi yenə “Neftçi” ilə bu dənizin sahilində yerləşən başqa bir şəhərə - Larnakaya yollanıram. Düzdü, Hayfada qanım qaralmışdı. Amma indi hər şey fərqlidi. Regekampf “ağ-qaralar”a yeni təyin olunsa da, komanda daxilində pozitiv əhval-ruhiyyə formalaşdırdığı görünür. Futbolçular öz aralarında söhbət edir, oyun haqda danışırdılar. Yalnız bir nəfər qaynıyıb-qarışmırdı. Söhbət komandanın yeni transferi Yeqor Boqomolskidən gedir. Belaruslu forvard sakitcə dayanıb, başverənləri izləyirdi.

Saat 09.15-də təyyarə yerindən tərpəndi. Səmadan Bakı daha gözəl görünür. Amma indi paytaxtla sağollaşmaq zamanı idi. Bizi Cənubi Kiprin ən böyük şəhərinə səfər gözləyirdi. Larnaka hava limanı Aralıq dənizi sahilində yerləşir. Təyyarə eniş edəndə çimərliklərdə dincələn adamları rahat görmək olurdu. Hava limanı ilə məskunlaşdığımız “Mikes Kanarium” oteli arasında piyada 25 dəqiqəlik yoldu. Lakin bizi qalacağımız yerə aparan avtobusun sürücüsünün xamlığı üzündən bu yolu 40 dəqiqəyə qət etdik.

“Neftçi” rəhbərliyinin qəribə xüsusiyyəti var. Heç vaxt jurnalistlərlə futbolçuları eyni oteldə məskunlaşdırmırlar. Bu bir tərəfdən yaxşıdı. Vacib görüş ərəfəsində futbolçuları narahat edən kimsə olmur. Klub rəhbərliyi və futbolçular “Radisson Blu”, jurnalistlər isə yuxarıda qeyd etdiyim “Mikes Kanarium” otelində məskunlaşmışdı. Nahardan sonra məşqin başlamasına təxminən 4 saat var idi. Bu isə şəhər haqda informasiya yığmaq üçün olduqca çox idi.

Həmkarlarım - “CBC Sport”un şərhçisi Ramil Cahangirov və “Qafqazinfo.az”ın muxbiri Elsəvər Məmmədovla birgə Larnakanı kəşf etməyə çıxdıq.
Əvvəlcə oteldən 10 dəqiqəlik məsafədə yerləşən “Finikouzes” çimərliyinə yollandıq. Yolüstü “Müqəddəs Lazarus” kilsəsinə də baş çəkdik. Məqsəd çimərliyə getmək idi axı. Bunun üçün yola davam etdik və 5 dəqiqədən sonra istədiyimiz yerə çatdıq. İlahi, insan belə rahat şəkildə dənizə gedə bilər?! Təsəvvür edin, şəhərin mərkəzində gəzirsən və ürəyin sıxılır, çimərliyə daxil olursan. Kimsə səndən hara getdiyini soruşmur, dənizdən istifadə üçün pul istəmir, səs-küy yoxdu, sudan iyi gəlmir, ortalıqda qarğıdalı, peraşki satanlar yoxdu. Adamlar dənizdən zövq alırlar...



1-2 saat günəşləndikdən sonra yollandıq Larnaka qalasına. Bura giriş pullu idi. Amma jurnalistlər üçün havayı. Yenə dadımıza həmişə olduğu kimi PFL-in akkreditasiyası çatdı. Nəzarətçi hardan olduğumuzu soruşdu, cavabımızı eşitsə də, tanımadı. Bakıdan gəldiyimizi biləndən sonra bizə xoş istirahət arzuladı. Larnaka qalası o qədər də böyük ərazidə yerləşmir. Tipik özünümüdafiə üçün salınmış məkandı. Dəniz mənzərəsi və osmanlı, ingilis topları, ərəbcə, yunanca yazılı divarları qalaya xüsusi gözəllik verirdi. Osmanlıların Kiprə təsiri elə bu məkandan hiss olunurdu. Qalada 4-cü otaq məhz Türkiyə türklərinin atalarının adı ilə bağlı idi. Elə qalanın arxasındakı küçə də bizim İçərişəhərə oxşayırdı. Adı isə bütün türk dünyasının xəyalı olan “Turan” idi. Ərazidə bir qədər gəzişdikdən sonra qayıtdıq otelə ki, gedək stadiona. Konfransın və məşqin vaxtı idi.



Otellə “AEK Arena” arasında təqribən 15 dəqiqəlik məsafə var. Oyuna 1 gün qalsa da, stadionun ətrafında tükürpədici səssizlik və qəribə qoxu var idi. Klubun əməkdaşları ilə də maraqlandıq. Heç larnakalılar da matça maraq göstərmirlər. Oyuna cəmi 1000 bilet satılıb. Ən ucuz biletin qiyməti də ki, 15 avro. Oyuna kimi stadionun dolacağı inandırıcı deyil.

Bir sözlə, bu gün “Neftçi” “Aris”lə qarşılaşacaq. Flaqman ötən mövsüm Aralıq dənizinin sahilində yerləşən şəhərin təmsilçisinə uduzmaqla avrokuboklarla vidalaşdı. Bu dəfə isə başlanğıc nöqtəsi eyni su hövzəsinin sahilində yerləşən fərqli şəhərdi. Ümid edək ki, 10 il öncə Cənubi Kiprdə Azərbaycan futbolu tarixində ilk dəfə Avropa Liqasının qrupuna vəsiqə qazanan flaqman yenə bu ölkədə yeni tarixin başlağıcını yazacaq...

İLKİN SULTANLI, Bakı-Larnaka