Yaxın keçmişə damğa vurmuş oyunçulardan olan İngiltərə yığmasının sabiq müdafiəçiləri Rio Ferdinandla Con Terri arasında son günlərdə söz davası yaşanır.

"Football-plus.az" xəbər verir ki, hər şey Ferdinandın seçimindən sonra başladı. ''Mançester Yunayted''in sabiq üzvündən premyer-liqa tarixinin ən yaxşı müdafiəçilərini seçmək tələb olunmuşdu. Onun özündən başqa Sol Kempbell, Toni Adams, Rikardo Karvalyo, Vensan Kompani, Yap Stam, Sami Hyuyupya, Con Terri, Vircil van Diyk və Nemanya Vidiçi seçmək fürsəti var idi. Ferdinand birinci yerə özünü qoydu.

Sonrakı pillələr üçün isə uyğun olaraq Vidiç, Van Diyk, Stam və Terrini seçdi. Onun bu seçimi ''Çelsi''nin əfsanəsi olan Terrinin xoşuna gəlmədi. Nəticədə Terri ''hər kəsin öz fikri ola bilər, amma statistika yalan danışmır'' ifadəsini yazaraq ''instaqram''ının hekayə bölümündə qazandığı uğurlarla bağlı qrafik materiallar dərc etdi. Orda onun FİFPronun versiyasına görə 5 dəfə ilin rəmzi komandasına düşməsi, kapitan kimi 5 çempionluq titulunu qazanması kimi faktlar qeyd olunmuşdu.

Bu polemikanı Ferdinand öz ''tvitter''ində bu sözlərlə davam etdirdi:

''Bir insan öz rekordları və uğurlarını gözə soxmağa başlayanda, bu, özündənrazılıq əlamətidi. Mənim qardaşıma dediyin irqçi sözləri nəzərə alsaq, sən hələ şükür elə ki, mən səni ilk ''5-liy''ə salmışam''. Terrini cavabı da özünü çox gözlətmədi: ''Özündənrazılıq əlaməti bir insanın bu siyahıda özünü birinci sıraya qoymasıdı. Çox sağol ki məni ''5-liy''ə salmısan''. Xatırladaq ki, 2011-ci ilin oktyabrında o vaxt KPR-in şərəfini qoruyan Rionun qardaşı Anton Ferdinandla Terri arasında oyunun gedişində münaqişə yaşanmışdı. Həmin vaxt Terri Anton Ferdinanda qarşı irqçi təhqirlərə yol verməkdə günahlandırılmışdı. Amma Vestminster məhkəməsinin qərarına əsasən Terrinin günahı sübuta yetirilməmişdi. Ümumiyyətlə Terri futbolçu kimi hər nə qədər ''Çelsi''nin əfsanəsi sayılsa da, tez-tez şəxsi həyatı ilə bağlı qalmaqallarla gündəmə gəlirdi. Onun sabiq komanda yoldaşı Ueyn Bricin həyat yoldaşı Vanessa Perronsel ilə yaşadığı eşq macərası uzun müddət gündəmi zəbt etmiş və futbolçunun bu hadisə üzündən DÇ-2010-dan öncə yığmada kapitan səlahiyyətləri əlindən alınmışdı.

Yeri gəlmişkən, premyer-liqa rəsmiləri eyni siyahını ''Liverpul''lu Van Diykə də təqdim ediblər və ondan da turnirin tarixinin ən yaxşı 5 müdafiəçisini seçmək tələb olunub. Niderlandlı müdafiəçi bu siyahıda birinci pilləyə məhz Ferdinandı qoyub. Onun siyahısında sonrakı pillələri Kompani, Stam, Terri və Hyuyupya tutub.