Mahir Emrelini Bakıda məşq etdirərərək dəstək olan Elmejor bu dəfə "Xan Lənkəran"a dəstək verib.

Fərdi futbol məşqçisi "Xəzər Lənkəran" Mərkəzi Stadionuna baş çəkib. Səfər zamanı Lənkəran təmsilçisinin kapitanı Mahsun Qənbərli ilə "Fırtınalar meydanı"nda maraqlı video çəkərək, şəxsi "instaqram" hesabında paylaşıb. Səfərin məqsədini və başqa detalları Elmejordan soruşduq:

"O stadiona getmək, çəkiliş etmək mənim üçün böyük qürur oldu. Orda çəkiliş etməyimin səbəbi dəstək məqsədlidi. Çünki klubu 1-ci diviziona buraxmadılar. O bölgədə həmişə futbol olub. "Xəzər Lənkəran"ın dönəmindən tribunalar həmişə dolardı. İnanıram ki, o tribunalarda yenə azarkeşlər olacaq. Fikrimcə, futbol mütləq Lənkərana dönməlidi. Regionlarda futbolun inkişafı Azərbaycan futbolunun ideal vəziyyətə gəlməsi ilə nəticələnəcək. Hətta Qurban Qurbanov da bu mövzuya dəfələrlə toxunub. Düşünürəm ki, mütləq şəkildə "Xan Lənkəran"a yardım etmək lazımdı".

- "Xan Lənkəran"ın kapitanı Mahsun Qənbərli ilə məşq etmisən. Belə seçimin səbəbi nədi?
- Mahsun vaxtilə "Xəzər Lənkəran"da da çıxış edib. Klub fəaliyyətini dayandırandan sonra Taylandda legioner həyatı yaşayıb. Təcrübəli futbolçudu. Hazırda da "Xan Lənkəran"ın kapitanıdı. Onunla danışanda yenidən Lənkərana gəldiyini, premyer-liqaya vəsiqə qazanmaq istədiklərini söylədi. Lənkəranda hamı futbolun geri dönməsini gözləyir. Təsəvvür edin ki, orda qaldığım 1 gün ərzində hamı "Xan Lənkəran"ın taleyi ilə bağlı suallar verirdi. Elə bildilər ki, yeni layihə üçün məşqə gəlmişəm. Amma təəssüf ki, sadəcə, dəstək üçün getmişdim.

- "Xan Lənkəran" diviziona buraxılmadı. Səncə, 3 il maneəsi bağışlana bilərdi?
- Klubda maliyyə baxımından heç bir problem yoxdu. Təcrübəli oyunçular var. Rəhbərlik, görülən işlər peşəkar səviyyədədi. Bazaları da var. Qışda təlim-məşq toplanışını Antalyada keçirdilər. Halbuki premyer-liqada çıxış edən "Keşlə" və "Səbail" bunu edə bilməmişdi. Region Liqası klublarının əksəriyyətinin şəraiti yoxdu. Ona görə ümid edirəm ki, heç bir problemi olmayan klubun müraciətini AFFA nəzərdən keçirəcək. Düzdü, 3 il söhbəti bir qaydadı. Amma komanda Region Liqasında çıxış edərək hazır olduğunu göstərdi. İnanıram ki, AFFA və klub bir qərara gəlib, futbolu yenidən Lənkərana qaytaracaq. Cənub zonası futbolu sevir. Ümid edirəm ki, onlar üçün bu şərait yenidən yaradılacaq.

Videonu sizə təqdim edirik:



GÜNAY VƏLİYEVA