2021/22 mövsümünü geridə qoymaq ərəfəsindəyik. Artıq növbəti “futbol ili” üçün hazırlıq da görülür.

AFFA İcraiyyə Komitəsinin ötən həftə keçirilən iclasında gənc oyunçu limitinin ləğvindən başqa, 1-ci diviziona “Araz Naxçıvan”, “Mingəçevir” və “İmişli”nin gətirilməsi də böyük geniş əks-səda doğurdu. Ötən gün isə Lisenziya Komissiyasının qərarları açıqlandı və növbəti mövsümdən etibarən premyer-liqada mübarizə aparacaq klublar məlum oldu. “Kəpəz”lə “Turan Tovuz” 2022/23 “futbol ili”ndə ölkə çempionatında çıxış edəcək. Son günlərdə futbolumuzda baş verən dəyişikliklərlə bağlı mütəxəssis fikri öyrənməyi lazım bildik. Buna görə də təcrübəl futbol adamı, AFFA-nın Məşqçilər Komitəsinin üzvü Əsgər Abdullayev ilə danışdıq.

- Yəqin ölkənin futbol gündəmində son günlərdə mühüm dəyişikliklərin baş verməsi fikri ilə razılaşarsız. Bu yeniliklərin önündə gənc oyunçu limitinin ləğvi gəlir. Bu haqda fikirlərinizi öyrənmək istəyirik? Qərarın futbolumuza təsiri olacaqmı?

- Düşünürəm ki, bu məsələdə düzgün qərar qəbul edilib. Onsuz da “6+5” limiti tətbiq olunur. Məncə, 21 yaş futbolçu üçün heç də az deyil. Dünyanın bir çox klublarının əsas heyətlərinə fikir versək, 17, 18, 19 yaşlı futbolçuların daha çox oynadığını görəcəyik. Dediyim kimi, 21 yaş heç də az deyil. Bu vaxta qədər artıq futbolçu kimi püxtələşmək lazımdı ki, heyətə məcburiyyətdən götürülməyəsən. Nədi-nədi, limit var, onsuz da oynayacam. Məsələn, elə “Sabah” bunun ən bariz nümunəsidi. Limitə uyğunlaşmaq üçün millinin qapıçısının əvəzinə gənc qolkiper oynatmağa məcbur olurlar. Amma futbolçu tam inkişaf edib heyətə düşmək üçün özünü göstərməlidi. Bu gün dünya ölkələrinin yığmalarında oynayanların böyük əksəriyyəti bu yaşdadı. 17 yaşlı uşaqlar da özlərini sübut edib milliyə düşə bilirlər. Əsas heyətin daimi üzvünə çevrilənlər də çoxdu. Ona görə də 20-21 yaşlı futbolçu özünə yer tapmalıdı.

- Klubların ən əsas tələbi legioner limitinin artırılması idi. Ancaq bu yöndə dəyişiklik olmadı. Sizcə, bununla bağlı dəyişiklik edilməliydi?

- Bu qaydaya yenilik edilməməsi yerində qərar oldu. Çünki bu məsələdə millinin maraqları da düşünülüb. Yerli futbolçular çox oynamalıdı. “Qarabağ”la “Neftçi”nin heyətində yer alan legionerlər effekt verir. Onlar bizim oyunçuların inkişafına da yaxşı təsir göstərirlər. Örnək olub komandanı arxalarınca apara bilrilər. Ancaq legioner xatirinə xaricdən ortabab futbolçuları gətirmək düzgün deyil. Onlar futbolumuzun inkişafında nə dərəcə rol oynayacaqlar? Açıq deyirəm, heç bir təsirləri olmayacaq. Ona görə də klublar əcnəbi futbolçunu heyətə qatarkən dərindən fikirləşməlidi.

- Bildiyiniz kimi, “Araz Naxçıvan”, “Mingəçevir” və “İmişli” yeni mövsümdən 1-ci divizionda çıxış edəcək. Bu klubların sözügedən çempionatda diqqəti çəkməyi bacaracağına inanırsız? Yeri gəlmişkən, Naxçıvan futboluna böyük töhfələr vermiş və bu klubu çalışdırmış biri kimi “Araz Naxçıvan”dan gözləntiləriniz nədi?

- Çox sevindirici haldı ki, bölgə təmsilçilərini növbəti mövsümdən həm premyer-liqada, həm də 1-ci divizionda daha çox görəcəyik. Böyük futbolun bölgələrimizə qayıtması üstünlükdü, inkişaf deməkdi. Naxçıvan da onun kimi. Futbolun inkişafına təkan vermək lazımdı. Mənim üçün “Araz Naxçıvan”ı yenidən peşəkar futbolda görmək olduqca sevindirici haldı. Onları təbrik edirəm. Bu bölgəmiz mütləq 1-ci divizionda olmalı idi. Bütün Naxçıvan da bunu istəyirdi. Bu komandaların çıxışına gəlincə, bunu zaman və onların qurduqları planlar göstərəcək.

- “Araz Naxçıvan”ın baş məşqçisi Azər Bağırov açıqlamalarında həmişə uzunmüddətli planlar qurduqlarını və 1-ci divizonda çıxış etməklə yanaşı, premyer-liqanı düşünəcəklərini, əsas hədəflərinin məhz bu olduğunu vurğulayıb. Siz bu haqda nə düşünürsüz?

- Niyə də olmasın?! Bir perspektiv üçün, bir də operativ plan var. Ola bilər ki, “Araz Naxçıvan” növbəti mövsüm yaxşı plan üzrə hərəkət edib uğurlu nəticələr qazansın. Bu da heç kimi təəccübləndirməməlidi. Yaxşı legionerləri də heyətə qatsalar, bunu gerçəkləşdirmək mümkündü.

- Birinci divizionla yanaşı, premyer-liqada da iki yeni komanda mübarizə aparacaq. Bunlar qərb bölgəsindən “Kəpəz” və “Turan Tovuz”du. Onların yenidən elitaya qayıtması ilə çempionatda hansısa intriqa yarana bilər?

- Bu klubların yenidən premyer-liqada çıxış etməsi haqda qərar çox düzgündü. Hər iki bölgəni futbol məkanı adlandıra bilərik. Çünki həm Gəncədə, həm də Tovuzda bir çox tanınan, istedadlı futbolçu yetişib və Azərbaycan futbolunda ad qoyublar.

SƏNƏM FƏRHADOVA