'Real''a uduzandan sonra fanatlarının etirazı ilə üzləşən, üstəlik son turda ''Monako'' önündə darmadağın olaraq son 4 rəsmi matçda 3-cü dəfə məğlub olan PSJ ilə bağlı qalmaqallı xəbərlər gəlməkdədi. ''RMC Sport''un yaydığı məlumata görə paltardəyişmə otağında artıq işlər cığırından çıxıb və komanda sözün əsil mənasında iki yerə bölünüb. Qruplaşmanın bir tərəfində cənubi amerikalılar, digər tərəfində isə fransızca danışanlar yığışıb. Hər məğlubiyyətdən sonra qruplaşmanın daha da dərinləşdiyi qeyd olunur. ''RMC Sport'' buna misal olaraq ''Monako'' ilə son matçın gedişində yaşanan bəzi epizodları xatırladıb. Məsələn, Neymar kobudluğa məruz qalanda hakimin başına 4-5 futbolçu yığışırdı. Amma Hakimi kobudluğa məruz qaldıqda buna, demək olar, heç kim reaksiya vermirdi. Ümumiyyətlə, mövsümün sonunda komandada hər mənada çox ciddi dəyişikliklərin olacağı gözlənilir. Bu mövsüm üçün isə rəhbərlik komandanın qarşısına heç olmasa, 1-ci pilləni sona qədər qorumaq və çempion olmaq hədəfi qoyub.