Sabah (Bakı) – Turan Tovuz 2:1 (0:1)
92. Stas Pokatilov – 6,0
2. Amin Seydiyev (k) – 6,0
5. Rəhman Daşdəmirov – 5,5
6. Abdullax Xaybulayev – 5,5
88. Xəyal Əliyev – 6,0
(22. Abdulla Rzayev, 83) – qiymətsiz
7. Boyan Letiç – 5,5
44. Sofian Çakla – 5,5
13. İvan Lepinitsa – 6,0
11. Kahim Parris – 5,5
(70. Cesse Sekidika, 46) – 7,0
99. Neqoş Kupusoviç – 5,5
(18. Pavol Şafranko, 46) – 6,5
33. Umarali Raxmonaliyev – 6,5
Ehtiyat oyunçular
1. Yusif İmanov
55. Nicat Mehbalıyev
17. Tellur Mütəllimov
9. Anatoli Nuriyev
77. Şakir Seyidov
32. Elgün Dünyamalıyev
12. Vinsent Til
Baş məşqçi: Vasili Berezutski
Komandanın ən yaxşısı: Cesse Sekidika

41. Sergey Samok – 5,0
88. Faiq Hacıyev – 5,5
7. İsmayıl Zülfüqarlı – 5,5
15. Emmanuel Hakman – 5,5
6. Araş Qaderi – 5,5
77. Veysəl Rzayev – 5,5
(44. Rüfət Əhmədov, 79) – qiymətsiz
9. Kristian Da Silva (k) – 5,5
(10. Xəyal Nəcəfov, 84) – qiymətsiz
23. Alexandro Serrano – 6,0
17. Rəhim Sadıxov – 5,5
90. Joarlem Santos – 5,5
21. Aleks Souza – 6,5
(11. Ayxan Quseynov, 84) – qiymətsiz
Ehtiyat oyunçular
1. İvan Konovalov
71. Mehman Hacıyev
39. Sadiq Quliyev
19. Orxan Əliev
8. Tural Bayramlı
13. Fərid Yusifli
30. Mircamal Əlizadə
29. Anton Kraçkovski
Baş məşqçi: Kurban Berdıyev
Komandanın ən yaxşısı: Aleks Souza

Qollar: A.Souza, 15 (0:1, A.Serrano). P.Şafranko, 50-p. (1:1). C.Sekidika, 61 (2:1, U.Raxmonaliyev).
Vərəqələr: A.Xaybulayev, 13 (qeyri-idman hərəkəti). A.Qaderi, 25 (qeyri-idman hərəkəti). V.Rzayev, 44 (qeyri-idman hərəkəti). K.Da Silva, 64 (qeyri-idman hərəkəti). S.Çakla, 88 (qeyri-idman hərəkəti) - sarı.
Hakimlər: İNQİLAB MƏMMƏDOV, Namiq Hüseynov, Rahil Ramazanov, Elvin Bayramov (hamısı Bakı).
VAR hakimi: Cavid Cəlilov (Bakı).
VAR hakiminin köməkçisi: Eyyub İbrahimov (Bakı).
Hakim-inspektor: İmanxan Sultani (Bakı).
AFFA nümayəndəsi: Azər Əsgərov (Bakı).
9 fevral. Bakı. “Bank Respublika Arena”. 800 tamaşaçı (9000 yerlik).
Birinci hissəyə 2, ikinci hissəyə 6 dəqiqə əlavə olunub.
Oyunun qiyməti: 6,0.

Bu oyunla bağlı intriqa nöqtələri hədsiz çox idi. Xeyli vaxtdı qələbəyə həsrət qalan “Sabah” 4-cü yerə iddiasını davam etdirmək üçün can qoyacaqdı. Bu komandanı 8 xal qabaqlayan “Turan Tovuz” isə qələbə təqdirində fərqi 11-ə çatdıracaq və faktiki 4-cü yer uğrunda mübarizəni bitirəcəkdi. Tovuzluların kubokda məğlubiyyətə görə qisas hissi ilə alışıb-yandığını da unutmayaq. Nəhayət, ölkəmizə Rusiya futbol məktəbindən gələn iki mütəxəssis növbəti dəfə münasibətləri aydınlaşdıracaqdı.

İlk dəqiqələrdə tərəflərin kəsərsiz hücumlarına şahidlik etdik. 9-cu dəqiqədə Xəyal Əliyev qapı qarşısına ötürmə versə də, Samok yerində idi. Qonaqlar ilk təhlükəli vəziyyəti qola çevirə bildi. 15-ci dəqiqədə Serranodan “yumşaq” ara ötürməsi alan Souza irəlilədi, müdafiəçilərin müqavimətinə rəğmən, topu tora qovuşdurdu – 0:1.

Növbəti təhlükəli hücumu meydan sahiblərinin ifasında izlədik. 19-cu dəqiqədə Lepinitsadan ötürmə alan Kahimin zərbəsində azacıq dəqiqlik çatmadı. 26-cı dəqiqədə Letiç cərimə zərbəsindən qapı qarşısına ötürmə versə də, Amin Seydiyev top başla zərbə vura bilmədi. 29-cu dəqiqədə qonaqları növbəti dəfə “Sabah”ın qapısına yol tapmağı bacardı. Rəhim - Souza-Batista kombinasiyasında sonuncu topu tora qovuşdursa da, VAR-dan gələn siqnalla qol qeydə alınmadı. Batista ofsaydda idi.

Berezutski oyunsonrası mətbuat konfransında fasilədə futbolçularla sakitləşdirici söhbət etdiyini desə də, 2-ci hissədə oyunun axarının kəskin dəyişməsinə əsasən düşünmək olar ki, söhbət “isti” olub. Sekidika və Şafrankonun meydana çıxması ilə “daşlar yerinə oturdu”. Çox güman, Berdıyev və “Turan Tovuz” bu dəyişikliklərə hazır deyildi. Hər halda, artıq 48-ci dəqiqədə dəyişiklik bəhrə verdi. Şafrankonun dabanla etdiyi ötürməyə sahib çıxmağa çalışan Sekidikanı Samok yerə sərdi. Belədə referi “nöqtə”ni göstərdi. Topun arxasına keçən Şafranko dəqiq zərbə ilə hesabı bərabərləşdirdi.

Cəmi 11 dəqiqə sonra bakılılar kuryoz qolla önə keçməyi bacardı. Rəhim Sadıxov Çaklanın ötürdüyü topu qəbul etmək üzrə olan Aminin önünü kəsdi. Ardından Seydiyev Rəhimin dabanını əzdikdən sonra futbolçu yerdə qaldı. “Turan Tovuz” cəbhəsində hər kəs ayaqa qalxsa da, referi heç bir qayda pozuntusu olmadığını söylədi. Aminin autdan daxil etdiyi topu qəbul edən Şafranko Xəyala ötürmə verdi. Xəyal – Raxmonaliyev - Sekidika kombinasiyasını sonuncu dəqiq zərbə ilə tamamladı – 1:2.

Qayda pozuntusu gözləyən tovuzluları bakılılar əks-hücumda məyus etdi. 78-ci dəqiqədə Sekidika uzaqdan bəxtini sınasa da, Samok yerində idi. 82-ci dəqiqədə Araşın zərbəsini Pokatilov dəf etdi. Uzatma dəqiqələrində Şafranko daha bir qol vurdu. Referisi öncə mərkəzi göstərsə də, ardından epizodu VAR monitorunda incələdi. İnqilab Məmmədov Lepinitsanın hərəkətini qayda pozuntusu kimi qiymətləndirdi və qol qeydə alınmadı.

Beləliklə, 5 turdu qələbə qazana bilməyən “Sabah” bu tilsimə son qoydu. “Turan Tovuz” isə mövsümün ikinci yarısında yalnız “Qarabağ”ı məğlub etməyi bacarıb, bir də “Səbail”lə heç-heçə edib. Avrokuboklara vəsiqəyə iddialı komanda üçün heç də yaxşı qrafik deyil.

Gözdən qaçmadı:
* “Ultras Turan” ətrafında birləşənlər “Soldati di Sabah”la müqayisədə iki dəfə çox idi.
* “Ultras Turan” “İnqilab, buranın Tovuzu da var” dedi.
* Baş hakim dəfələrlə Berdıyevin köməkçisi Yunis Hüseynovu sakitləşdirməyə çalışırdı.

ƏSƏD SEYİDOV