Cari mövsümdə Qızlar yüksək liqada sona 2 tur qalmış Sabir Mütəllimovun çalışdrdığı “Sumqayıt”ın çempionluğu rəsmiləşdirdiyini ötən saylarımızın birində xəbər vermişdik.

Sabir bəylə söhbətdə həm komandası, həm də ölkədə qadın futbolunun ümumi durumu barədə danışdıq.

- Öncə çempionluq münasibəti ilə sizi və komandanızı təbrik edirik.
- Çox sağ olun.

- Mövsümlə bağlı fikirlərinizi bölüşərdiz...
- Çempionatda 10 komanda mükafatlar uğrunda mübarizə aparırdı. Mövsüm başa çatmasa da, artıq çempion olacağımız rəsmiləşib. Cari mövsümdə 6 çətin oyunumuz oldu. Həm “Neftçi”, həm “Xırdalan Siti”, həm də 8 saylı İOEUGİM çempionluq uğrunda mübarizə aparırdı. Ancaq biz bu mübarizədən qalib ayrıldıq. 17 matçın 13-də qalib gəlib, 4-də heç-heçə etmişik. Çempionatda məğlubiyyət acısı dadmayan yeganə komandayıq.

- 2019-cu ilə qədər Sumqayıtda rəhbərliyiniz altında komanda var idi. Pandemiya dönəmində həmin kollektiv fəaliyyətini dayandırdı. Ötən yay yenidən komanda formalaşdırmalı olduz. Azərbaycan mentallığını nəzərə alsaq, yeni, həm də çempion komandanı qurmaq çətin olmadı?
- Hər işdə çətinlik var. Ancaq bir şeyi çox istəyirsənsə, bütün maneələri keçib ortaya normal iş qoymaq mümkündü. Pandemiya dönəmində köhnə kollektivin əksər üzvləri başqa sahələrə üz tutdu. Bu səbəbdən ötən yay yeni komanda fortmalaşdırmaq məcburiyyətində qaldım. Komandaya sumqayıtlı qızlarla yanaşı, Bakıdan və rayondan futbolçu dəvət etdik. Hazırda “Sumqayıt”ın heyətində Bakıdan 4, Balakəndən isə 2 qış çıxış edir. Öz yetirmələrimiz də kifayət qədərdi. Sadəcə, onların yaşı azdı. Ona görə də lazımi qədər oyun təcrübəsi qazanmırlar. Qarşıdakı illərdə hamısı “Sumqayıt”ın əsas heyət üzvü olacaq.

- Qızlardan ibarət komandanı çalışdırmaq çətin deyil?
- Yenə deyirəm, hər sahənin çətinliyi var. Bizdə əsas problem mentallıqla bağlıdı. Çox valideyn qızını futbola buraxmaq istəmir. Uşaq özü futbol oynamaq istəyir. Müraciət edir, seleksiyadan keçir. Bəyənib komandaya cəlb edirik, ancaq ata və ya ana qızını futbola buraxmır. Belədə bütün planların alt-üst olur.

- Ümumiyyətlə ölkədə qadın futbolunun səviyyəsi necədi?
- Əladı söyləsəm, yalan demiş olaram. Bərbad demək də olmur. Ortadı. Qadın futbolu bütün dünyada inkişaf edir. Özünüz də görürsüz ki, hər il FİFA və UEFA səviyyəsində təşkil olunan tədbirlərdə xanım futbolçular arasında da ən yaxşıları seçirlər. Bu o deməkdi ki, ali qurumlar qadın futbolunun inkişafını istəyir. Biz də tədricən bu sahəyə daha çox diqqət ayırmalı, inkişafa çalışmalıyıq.

- Son tur ərəfəsində “Sumqayıt” çempionatda məğlub olmayan yeganə kollektivdi. Komandanın məhsuldarlığı da göz oxşayır -108 qol. Müdafiə də etibarlıdı - 17 matçda rəqiblər cəmi 8 dəfə sizi məyus edib...
- Çempionatın bombardiri Şəfəq Nəsirova komandamızın üzvüdü. Onun hesabında 64 qol var. Qapıçımız Dəniz də çox etibarlıdı. Ancaq bu o demək deyil ki, hər şeyə görə məhz bu futbolçulara borcluyuq. Hücumçü qol vurursa, deməli, yarımmüdafiə onu topla təmin edir. Qapıçımız az qol buraxıbsa, bunda müdafiəçilərimizin də böyük rolu var. Bir sözlə, balanslaşdırılmış komandayıq.

- Yığma səviyyəsində vəziyyət o qədər də xoş deyil. Qadınlardan ibarət milli, demək olar, qatıldığı bütün turnirlərdən əli ətəyindən uzun dönür. Uğur üçün nə lazımdı?
- İlk növbədə güclü çempionat. Çempionatın səviyyəsi artacağı halda milli də “artıracaq”. Buna isə müyyən vaxt lazımdı.

- Çempion olduğunuza görə klub rəhbərliyi və ya AFFA tərəfindən mükafatlandırılmısız?
- Mövsümdə son oyunumuz mayın 24-də baş tutacaq. Mükafatlandırma da onda olmalıdı. Yəqin ki, həm klub rəhbərliyi, həm də assosiasiya qızları sevindirəcək. Ümumiyyətlə, klubun prezidenti Riad Rəfiyev, idman direktoru Faiq Hacı-Məhərrəmov komandamızı daim diqqətdə saxlayır, lazımi şəraiti yaradır. Onlarla yanaşı, stadionda çalışan qadın əməkdaşların da komandaya marağı böyükdü. Hər dəfə səfər oyunlarından sonra bizimlə əlaqə saxlayır, necə oynamağımız, nəticə ilə maraqlanırlar.

- Zirvəyə yüksəlmək ağır zəhmət tələb edir, ancaq orda qalmaq daha çətindi. Növbəti mövsümdə çempion titulunu qorumaq çətin olmayacaq?
- Çalışacağıq zirvədəki yerimizi qoruyaq. Tədricən ehtiyat qüvvə də yetişməkdədi. Eşitdiyimə görə, növbəti mövsümdən qadın futbolunda da çempion olan komanda ölkəmizi avrokuboklarda təmsil edəcək. Belə daha yaxşı olar. Avrokuboka vəsiqə qızlara əlavə motivasiya verər.

RƏŞAD