“Çelsi”də işlər qaydasında getmir: komanda bütün turnirlərdə keçirdiyi son 10 oyunun yalnız birində qələbə qazanıb, bugünlərdə hətta “Sauthempton”a – elitanın aşkar autsayderinə də uduzub. Turnir cədvəlinin 10-cu pilləsinə yuvarlanan londonluların düşərgəsində vəziyyət necədi? Oyunçular, klub əməkdaşları və rəhbərlik baş məşqçi Qrehem Potter haqda nə düşünür? Müxtəlif qaynaqlarda yer alan xəbərləri ümumiləşdirməyə çalışdıq.

Football-plus.az xəbər verir ki, Potterin əksər sələflərindən fərqli “Çelsi”nin oyunçuları ona nifrət bəsləmir, hətta heyətə salmadıqları da. Onu insani keyfiyyətlər baxımından da oyunçulara diqqət göstərən yaxşı və dürüst adam sayırlar. Klub əməkdaşlarından birinin fikri: “Potter mehriban, əlçatan adamdı. Qaş-qabağı yerdə gedənlərdən deyil. Onunla qalan adamlar arasında heç bir maneə yoxdu. Bəzən şəxsi tənqidə dözümsüz yanaşsa da, obyektivliyi xoşuma gəlir. Potter başqa məşqçilərdən fərqli heç bir problem yaratmır, çox təvazökar, ağıllı və nəzakətlidi. Oyunçular arasında ona münasibətdə heç bir neqativ hiss etməmişəm. Ümumi əhval-ruhiyyə belədi: “İşlər qaydasında getmir, bu vəziyyədən çıxmalıyıq”. Bu nifrətə və ya məyusluğa oxşamır. Kobhemdəki bazanın dəhlizində gəzərkən heç bir gərginlik, ikrah hiss etməyəcəksiz. Sadəcə, hər kəs mövcud durumun öhdəsindən gəlməyə çalışır”.

Rəhbərlik hələ də tam halında Potteri dəstəkləyir. Düzdü, komandada bunun uzun müddət davam etməyəcəyini düşünənlər də var. Qarşıdan “Tottenhem”, “Lids” və “Borussiya” ilə oyunlar gəlir. Yenə də qələbələr olmasa, Potterin mövqeyi zəifləyəcək. Baş məşqçi komandanı böhrandan çıxara, uzunmüddətli perspektivdə isə Qvardiola və Klopp ilə taktiki cəhətdən mübarizə apara biləcəkmi? Bax, oyunçularda bununla bağlı şübhələr var.
Komandada qış transferlərindən sonra çətin çağırışla üz-üzə qalan Potterin halına yanırlar. Əsas heyət oyunçusuna yaxın qaynaq deyir: “İndi ulduzlar qrupu yox, komanda yaratmaq lazımdı. Bu isə ən çətin addımdı”.

İndi baş məşqçi yeniləri komandaya uyğunlaşdırmaqla yanaşı, gələcəyindən yana narahat olan başqa futbolçulara da müəyyənlik bəxş etməlidi. Komandada belə hesab edirlər ki, yenilər mövsümün yaz hissəsində daha çox oyun vaxtı qazanacaqlar, amma eyni zamanda onlardan bəzilərinin klubun standartlarına uyğun gəlmədiyini düşünənlər də var. Köhnə “Çelsi”dən qalan bəzi futbolçular belə hesab edir ki, heyətin bu miqyasda silkələnməsinə ehtiyac yox idi. Hər halda, bu komanda yaxınlarda Çempionlar Liqasını qazanıb, indi isə uzun və ağrılı yenidənqurma mərhələsini arxada qoymalıdı. Londonluların oyunçularına yaxın qaynağın fikri də maraqlıdı: “Everton”da çalışırsansa, hər şeyi yandırmağın və sıfırdan başlamağın mənası var. Ancaq bura “Çelsi”di”.