“Lids” Cessi Marşla vidalaşandan iki həftə sonra baş məşqçi postunda amerikalını əvəz edəcək mütəxəssisi müəyyənləşdirdi. Bəli, yorkşirliləri böhrandan “Rubin” və “Valensiya”nın sabiq çalışdırıcısı, İngiltərə premyer-liqasında iş təcrübəsinə də malik – vaxtilə “Uotford”un “sükanı arxasında” olub – Xavi Qrasiya çıxarmalıdı.

Football-plus.az xəbər verir ki, hazırda turnir cədvəlinin 19-cu pilləsində qərarlaşan “Lids” çempionşipə yuvarlanmaq təhlükəsi ilə üz-üzədi. “Ağlar”ı bu gün elitada qalmaq uğrunda mübarizədə əsas rəqiblərindən olan “Sauthempton”la vacib oyun gözləyir. Bəs Qrasiyanın təyinatı “Elland Roud”da əhval-ruhiyyəyə necə təsir edə bilər?

Sent-Olbansdakı Çekker-strit daim qaynaşan yerdi. Müxtəlif restoranların və barların yerləşdiyi bu küçə “Uotford”un əməkdaşlarının və oyunçularının dincəldiyi əsas yerdi. Yaxınlıqda yerləşən klub bazasında məşqdən sonra onların bir qədər əylənməyə ehtiyac duyması təbiidi. Xavi Qrasiya 2018-ci ilin yanvarında “arılar”ın “sükanı arxasına” keçəndən dərhal sonra həmkarları onu pablardan birində oturmağa dəvət etdi. Əlbəttə, bu bir rəmzi jest idi, heç kim ispaniyalı məşqçinin dəvəti qəbul edəcəyinə inanmırdı. Bu üzdən baş məşqçi korpusu ilə birgə pabın qapısı önündə görünəndə içəridəkilər onu böyük coşqu ilə qarşıladı. Qrasiya burda çox dayanmadı, heç nə içmədi, amma gəldi. Üstəlik hesabı ödəməyi də lazım bildi.

İspaniyalı mütəxəssisi tanıyan hər kəs dərhal sizə onun əsas keyfiyyətlərindən danışacaq – ünsiyyətcil, dostcanlı, söhbətə meyilli və səxavətli adamdı. Vaxtilə Xavi Qrasiyanın rəhbərliyi altında çalışan futbolçulardan biri belə deyir: “Lids”in oyunçuları onun naminə özünü incidəcək”.

Qrasiyanın həmin gün pabda görünməsi kiçik möcüzəyə yol açdı. O, “Uotford”un personalı və oyunçuları ilə dərhal anlaşmaya nail oldu. Bu isə yaxşı gələcəkdən xəbər verirdi. Mövsümün sonunda 14-cü yeri tutan “arılar” elitada yerini qorudu. Növbəti mövsüm daha uğurlu oldu. “Uotford” premyer-liqada 11-ci yeri tutdu və son 35 ildə ilk dəfə ölkə kubokunun finalına çıxdı. Əlbəttə, indi də “Lids”in azarkeşləri elitada qalmağa ikiəlli razı olarlar. Mövcud vəziyyətdə onların başqa hədəfi ola bilməz. Ancaq azarkeşlər ən azı əmin ola bilərlər ki, onların klubunu məhz belə vəziyyətlər üçün iş təcrübəsi olan mütəxəssis çalışdıracaq. Bundan başqa, Qrasiya müsbət əhval-ruhiyyədən məhrum olan kollektivləri canlandırmaq bacarığına malikdi.
“Lids”in oyunçuları “Torp Arç”dakı elə ilk səhərdə yeni məşqçini prosedur otağında görəcəklər. Qrasiya ora fizioterapevtlərə məsləhət vermək və ya zədəli oyunçuları yoxlamaq üçün baş çəkməyəcək. Xavinin ürəyindən, sadəcə, futbolçularla söhbətləşmək keçir. İspaniyalıya yaxın qaynaqlardan biri bu haqda belə deyir: “O, sadəcə, “növbətçi” suallar vermir, deyilənləri dinləməyə çalışır. Qrasiya gerçəkdən futbolçularının və personalın durumunu öyrənməkdə maraqlıdı. Onların hansısa problemi varsa, bu, baş məşqçinin də problemidi”.

“Lids”in oyunçuları bundan sonra tez-tez “keç, otur” ifadəsini eşidəcək. Qrasiya dəvətedici jestlə stulu irəli itələyəcək ki, ünsiyyət saxlasın. “Uotford”da bu vərdiş adət halını almışdı, çünki Qrasiya futbolçularla təkbətək söhbətləri xoşlayır. İspaniyalı mütəxəssis çalışır ki, komanda onun hüzurunda özünü rahat hiss etsin, oyunçular böyük-kiçikliyindən asılı olmayaraq, istənilən problemə görə qapısını döyə bilsinlər. O həm də futbolçuların etimadını qazanmaq istəyir. Və “Uotford”da ispaniyalı sərhədsiz etimad qazanmışdı, hər kəs ona güvənirdi. Komandada nəsə qaydasında deyilsə, bu artıq fərdi səhv deyil, kollektivin problemidi. Kollektiv Qrasiyanın ayrı-ayrı şəxsləri tənqid dalğasının ağuşuna atmamasını yüksək dəyərləndirir. 52 yaşlı mütəxəssis, adətən, diqqəti komandaya yönəltmək əvəzinə günahı öz üzərinə götürməyə üstünlük verir.

Bu o anlama gəlməməlidi ki, Xavi Qrasiya ağır söhbətlərdən çəkinir. İdarəçi kimi onu fərqləndirən əsas cəhətlərdən biri də daim konkret oyunçuya yerini göstərmək bacarığının olmasıdı. Kimsə oyun üçün iştirak ərizəsinə salınmırsa, onda baş məşqçi səbəbkara bunu ən xırda detallara qədər anladacaq və deyəcək ki, heyətlə yer almaq üçün nə etmək lazımdı.

“Lids”in oyunçuları onun dürüstlüyünü və açıq danışmasını mütləq dəyərləndirəcək. Vaxtilə “Uotford”da olduğu kimi. “Arılar”ın məşq bazasında futbolçular tez-tez məşqçi stolunun arxasında nahar edirdilər. Bəlkə də başqa klublarda belə praktikaya rast gəlməzsiz. Ancaq ispaniyalı mütəxəssisin söykəndiyi mədəni dəyərlər belədi ki, o, özünü vahid kollektivin bir hissəsi kimi görür.

Xavi Qrasiya oyuna köklənmək planında diqqətli məşqçidi. O, mövcud durumu xırda detallarına qədər aydınlaşdırmağı xoşlayır. İspaniyalı futbolla nəfəs alır və yaşayır. Deyilənə görə, üç uşaq atası olan Qrasiya işdən kənarda nümunəvi ailə başçısıdı, onun əsas ehtirası isə futboldu.

“Lids”in futbolçuları Qrasiyanın məşq sessiyasının necə cəlbedici olduğunu da görəcəklər. Qaynaqlardan birinin dedikləri: “Onun məşq seanslarını sönük adlandırmaq çətindi. Oyun ərəfəsində taktiki hazırlığa ciddi fikir verir, ancaq məşqdən sonra gileylənən futbolçu görməzsiz”.

Xavi Qrasiya komandaya hücum üslubu aşılamağa çalışacaq, ancaq onun məşqlərinin təməlində oyunun təşkilinə dair struktur yaratmaq dayanır. Onunla “Vikaric Roud”da çalışanlarda ispaniyalı mütəxəssisin adı hələ də təbəssüm yaradır. Qrasiyanın sabiq həmkarlarının əksəri onunla hələ də əlaqə yaratmağa çalışır, bu məqam isə vaxtilə onunla çalışanların bu mütəxəssisi necə yüksək dəyərləndirməsinin sübutudu.

İspaniyalı mütəxəssis “Uotford”dan 2019-un sentyabrında – 8 oyunluq qələbəsiz seriyadan sonra qovuldu. Qrasiya “arılar”ın düşərgəsini beynəlxalq oyunlar üçün yaranan fasilədə tərk etdi, bu üzdən xoş iş mühiti yarardığı adamların bir çoxu ilə vidalaşa bilmədi. Bu fakt hələ də “Uotford”un bəzi əməkdaşlarında narazılıq doğurur. Ardından “Valensiya”da və Qətər “Əl-Sədd”ində çalışdı. 4 il ötəndən sonra 52 yaşlı məşqçi premyer-liqaya qayıdır. Onun qarşısına ambisiyalı vəzifə qoyulub – “Lids”i çempionşipə yuvarlanmaqdan xilas etməlidi. Şayiələrə inansaq, Qrasiya artıq “Elland Roud” əhlinə xoş təsir bağışlayıb. “Lids” azarkeşlərinə inanmaq qalır ki, ispaniyalı yalnız komandadakı atmosferi düzəltməyəcək, həm də təhlükəli zonadan kənarda finişə çatmağı bacaracaq.