Xavinin mətbuat konfransları get-gedə maraqlı xarakter alır.

Elə “Futbol+” səhifələrində İspaniya çempionatının icmalını izləyənlər onun “qızıla bərabər 3 xal...” ifadəsindən xəbərdardı. Nazim Süleymanov “futbolun meyvəsi qoldu” deməyi xoşladığı kimi, Xavi də yerli-yesiz “qızıla bərabər 3 xal” ifadəsini işlədir. Kataloniyalı mütəxəssis son günlərdə daha iki mətbuat konfrasında “hoqqa verib”. Birində rəqibə münasibətdə nəzakətsiz davranıbsa, o birində özü həmkarımızdan inciyib.

“Seuta”nı necə incitdi?
İspaniya kubokunun 1/8 final mərhələsinin püşkü atılandan sonra “Barselona”nın baş məşqçisi qarşılıqlı hörmət prinsipindən çəkildi – kataloniyalıların bəxtinə düşən 3-cü divizion klubu “Seuta” haqda laqeydcəsinə danışdı: “İlk dəfə püşkatmada bəxtimiz gətirdi. “Barsa”ya aşağı səviyyəli rəqib düşdü. Onu da unutmaq olmaz ki, bir neçə gün əvvəl “İntersiti” ilə oyunda fiaskonun astanasındaydıq”.

Maraqlıdı ki, Xavi əvvəllər, adətən, püşkatmadan gileylənirdi. Məsələn, Avropa Liqasında “Mançester Yunayted” “Barsa”ya rəqib olanda belə demişdi: “Yenə də mümkün püşklərdən ən pisidi. “Barsa”nın bəxti gətirmir. Bu ən çətin rəqibdi”.

Xavinin yuxarıda xatırlatdığımız ifadələri “Seuta”nın çalışdırıcısı Xose Xuan Romeronun xoşuna gəlmədi: “Bu şərhi uğursuz sayıram. O, bu fikri fərqli şəkildə ifadə edə bilərdi. Fikirləri nə mənim xoşuma gəldi, nə də komandanın. Rəqibdən futbolka istəməyəcəyik. Oyun bitəndən sonra kimin bəxtinin çox, kimin bəxtinin az gətirdiyini görəcəyik. Bəlkə də o bizim kimi komandaların bu nöqtəyə çatmaq üçün nə qədər güc sərf etdiyini bilmir, çünki məşqçi karyerasında daha asan yolla irəliləyib. Mən ikiüzlü deyiləm, həmişə rəqibə böyük hörmətlə yanaşmağa çalışıram. Və həmişə də aşağı divizion komandalarına hörmət edirəm, axı özüm də ordanam. Bu açıqlama xoşuma gəlmədi. Xaviyə heyranam, fikrimcə, İspaniyanın ən möhtəşəm futbolçularından biridi. Amma son açıqlaması təəccübləndirdi”.

Divizonlara görə mühakimə yürütsək, “Barselona”nın bəxtinə həqiqətən də ən zəif rəqib düşüb – “Seuta” mübarizəni davam etdirən 16 komanda arasında yeganə 3-cü dəstə təmsilçisidi. Qalan komandalar ya La Liqada, ya da La Liqa 2-də yarışır. Üstəlik 16 turdan sonra cəmi 7 xal toplayan “Seuta” Sequnda B-də də aşkar autsayderdi, sonuncu yerdədi. “Seuta” ilə səfər oyununun coğrafi özəlliyi də var – oyun İspaniyanın Afrikanın şimal sahilində yerləşən iki yarımeksklavından birində, yəni Seutada (digəri Melilyadı) keçiriləcək. Kataloniyalılar artıq bir dəfə bu komandanın qonağı olub. 2010-cu ildə keçirilən kubok oyunu üçün yerli stadionun tutumu 2600-ə çatdırılmışdı. Onda ən baha biletlərin qiyməti 150 avro idi, ancaq mövsümlük abonoment sahibləri üçün endirimlər də var idi. Gözlənildiyi kimi, “Seuta” uduzdu (0:2), sadəcə, meydan sahiblərinin rəhbərliyini nəticə yox, “Barsa”nın heyəti məyus etdi. Yerli azarkeşlər qonaqların əsas ulduzlarını görəcəyinə ümid edirdi, ancaq nə Messi, nə Xavi, nə də İnyesta Seutaya yollanmışdı.

Xavi jurnalistin hansı sualına təəccüblənib?
Xavinin daha bir əcaib sitatı “İntersiti” ilə oyundan sonraya aiddi. “La Sexta” və “Antena 3”ü təmsil edən həmkarımız ona sual verərkən vurğulayıb ki, “Barsa” az qala daha zəif rəqibə uduzacaqdı. Bu sualı eşidən baş məşqçi gülərək deyib: “Demək olar ki, uduzurduq, eləmi? Möhtəşəmdi. Siz bunu istəyirdiz? Siz bunu istəyirdiz?”

“Seuta” kimi Sequnda B-də, ancaq başqa qrupda çıxış edən “İntersiti” ilə oyunda “Barsa” həqiqətən əziyyət çəkdi və yalnız əlavə vaxtda qələbə topunu vurdu – 4:3. Xəbər verdiyimiz kimi, “İntersiti” üç dəfə hesabı bərabərləşdirə bildi və rəqibin bütün qollarını “Barsa” akademiyasının yetirməsi Oriol Soldevila vurdu. Ən çox təəccüb doğuran məqam isə budu ki, “Barsa” faktiki əsas heyətlə oynadı. İlk qolun müəllifi Ronald Arauxo oyundan sonra belə dedi: “Kubokun cazibə qüvvəsi də bundadı. Biz artıq bunu bilirik. Bir neçə il əvvəl kuboku qazananda hər oyun əlavə vaxta qədər uzanırdı”.
Xavi isə iddia etdi ki, “Barsa” dəfələrlə güclü idi, sadəcə, öz həyatını çətinləşdirdi. Artıq yanvarın 18-də “Seuta”ya rəqib olmaqla “Barsa”nın nə dərəcədə bəxtinin gətirdiyini biləcəyik. Kubokun 1/8 final oyunu məhz həmin gün keçiriləcək.