“Forza Neftçi” Rəşad Dağlıya niyə dəstək verib? - AÇIQLAMA
Misli premyer-liqasının 14-cü turunun "Neftçi" - "Qəbələ" oyununda "Forza Neftçi" azarkeş qrupu İsgəndər Mehdiyevi öldürdüyünə görə həbs olunan meyxanaçı Rəşad Dağlıya dəstək nümayiş etdirdi.
"Football-plus.az" xəbər verir ki, ağır cinayət törədən birinin dəstəklənməsi təəccüb doğurdu. Bunun səbəbini "Forza Neftçi"nin fəallarından olan Aqil Məmmədquliyevdən soruşduq: "Əvvəla, bütün "Neftçi" azarkeşləri adından onu xüsusi qeyd edim ki, biz sağlam həyat tərzinin tərəfdarıyıq. Yəni narkotik vasitələrə və onların satışıyla məşğul olanlara çox dözülməz münasibət bəsləyirik. Rəşad Dağlıya dəstəyə gəlincə, yalnız öz adımdan danışa bilərəm. Onun törətdiyi cinayətə haqq qazandırmıram, buna görə cavab verəcək. İnanıram ki, məhkəmə meyxanaçının işinə ədalətlə baxacaq və layiq olduğu cəzanı alacaq. Heç kim də məhkəmənin qərarına qarşı çıxa bilməz. Amma məsələyə başqa prizmadan baxsaq, yüzlərlə gəncin narkotik aludəçiliyinin şahidi oluruq. Hətta xəbərlərdə narkotikə qurşananların sayında kəskin artımı olduğu qeyd edilir. Nə qədər ailələr əzizlərini bu zərərli vasitələr üzündən itirir. Mən özüm valideynəm, 3 uşaq atasıyam. Hamı kimi mən də istəmirəm ki, övladlarıma narkotik satılsın. Bu işlə məşğul olanları kəskin şəkildə qınayıram. Onların bu iyrənc əməlləri yüzlərlə, minlərlə ailəni bədbəxt edir. Dövlət ailədən başlayır. Ona görə də ailəmizi məhv edən narkotik vasitələrə və onların ticarətiylə məşğul olanlara imkan verməməliyik. Amma bu o demək deyil ki, narkotik satışıyla məşğul olanları harda gördüksə, öldürməliyik. İlk növbədə övladlarımızı və yaxınlarımızı bu zəhərdən uzaq tutmalı, onları maarifləndirməli, ticarətiylə məşğul olanları kəskin şəkildə qınamalı və dövlət orqanlarına bu işdə yardımçı olmalıyıq. Kimlərsə narkotikin yayılmasında belə maraqlıdısa, bunu öz ailəsinə və əzizlərinə paylasın. Eynilə Rəşad Dağlı demişkən: "Bariqa, mal satanlar, getsin öz evinə satsın, atası da kulivatlasın, anası da kulivatlasın". Bir daha təkrak edirəm ki, qətlə haqq qazandırmıram. Amma məsələyə mənəvi, valideyn, ata-qardaş, qohumluq prizmasından da baxmaq lazımdı. Heç kim istəməz ki, onun əzizini kimsə narkotik vasitələrlə zəhərləsin. Rəşad Dağlı da ailə başçısı, ata, qardaş, əmi-dayı kimi yaxınlarının zəhərlənməsini istəməyənlərdəndi. Hüquq-mühafizə və məhkəmə orqanlarına dərs keçmək və ya yol göstərmək kimi niyyətim yoxdu. Amma meyxanaçının narkotik satanı qətl edərkən hansı hislər keçirdiyini, valideyn kimi həyəcanını, affekt vəziyyətini və sair bu kimi nüansları da nəzərə almaq lazımdı. Həmçinin Rəşad bəziləri kimi cinayət törədib qaçmayıb. Adam özü gedib polisə təslim olub. Onun belə kişi addımı da mənim və çoxlarının rəğbətinə səbəb olub. Narkotiklə bağlı qafiyəsi çoxları kimi, mənim də xoşuma gəldi. Düşünürəm ki, bu qafiyə narkotik satanlara və narkotik vasitələrin təbliğinə qarşı yaxşı reklam oldu. Yaxşı olardı ki, ziyallılarımız, ictimai-siyasi xadimlər, imkanlı şəxslər, yaradıcı insanlar bacardığı çərçivədə bu məsələdə qınayıcı mövqedə olsunlar və qarşını almaq üçün maarifləndirici, profilaktik tədbirlər həyata keçirsinlər. Allahdan Rəşad Dağlının da tezliklə qapısını açmasını diləyirəm".
ABDULLA İSMAYILOĞLU
Digər xəbərlər
