AFFA-nın sifariş etdiyi geyim dəstləri sərhəddə “ilişib”
İlk turla bağlı Region Liqası üzrə işçi qrupun üzvü, AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyevlə əlaqə saxlayıb fikirlərini öyrəndik:
"Football-plus.az" xəbər verir ki, o belə demişdi:“İlk turda “fors-major” hadisə yaşanmadı, təqvimdə nəzərdə tutulan bütün qarşılaşmalar baş tutdu. Ola bilsin, hansısa oyunda xırda çatışmazlıq olub. Mövsümün startı olduğuna görə hansısa komanda təşkilatçılıq baxımından qüsura yol verə bilər. Ancaq ciddi, xüsusi problem yaşanmayıb”.
Əslində Region Liqasında yeni mövsüm oktyabrın 23-də başlamalıydı. Ancaq AFFA-nın iştirakçı komandalar üçün sifariş etdiyi geyim dəstləri həmin vaxt ölkəyə gəlmədiyindən turnirin startı iki həftə yubandı. Düşünmək olardı ki, artıq bu çatışmazlıq aradan qalxıb və iştirakçılar forma ilə təchiz olunduğundan ötən bazar liqada ilk turun oyunları keçirilib. Ancaq Yusif bəy geyim dəstlərinin hələ də ünvana çatmadığınıi bildirdi: “İştirakçı komandaların hamısına toplar və lazımi inventarlar verilib. Problem forma ilə bağlıdı. Geyim dəstlərinin ölkəyə gəlib çıxmaması AFFA-dan asılı deyil. Son vaxtlar Gürcüstan – Türkiyə sərhəddində tıxac olduğundan sifariş olunan formaları gətirən nəqliyyat vasitələri orda ilişib qalıb. Vəziyyəti klub rəsmilərinin diqqətinə çatdırdıq. Sağ olsunlar, bizi başa düşdülər və ilk turda hər komanda özündə olan formalarla meydana çıxdı. Növbəti turlardan problem aradan qalxacaq”.
RƏŞAD
