Moldova klubunun azərbaycanlı rəsmisi nöqtə qoydu - AÇIQLAMA
Novruz Əzimovun baş məşqçisi olduğu "Dinamo-Avto" hazırda Moldova çempionatında sonuncu pillədə qərarlaşıb. Bu üzdən klub rəhbərliyinin dəyişməsi gündəmdədi.
Komandanın çıxışı və rəhbərliyin dəyişməsi ilə bağlı yayılan söz-söhbətə münasibət bildirən Novruz bəy “Football-plus.az” saytına açıqlamasında söylənilənləri şayiə adlandırmışdı:
"Klub rəhbərliyinin dəyişməsiylə bağlı deyilənlər söz-söhbətdi. Elə bir dəyişiklik yoxdu və gözlənilmir. Hazırda bir oyunumuz qalıb, ona hazırlaşırıq. Noyabrın 9-da 14-cü tur çərçivəsində son matçımızı keçirərək qış fasiləsinə yollanacağıq”.
Ancaq əldə etdiyimiz məlumata görə, “Dinamo-Avto”nun idman direktoru Rəsul Allahverdiyev (Şükürsoy) artıq Azərbaycandadı. Olmaya Rəsul bəy Moldova klubunun rəhbərliyindən gedib? Bu suala və söylənilənlərə aydınlıq gətirmək üçün onunla əlaqə saxladıq:
“Moldova təmsilçisindən ayrılmağım haqda xəbərlər dezinformasiyadı. “Dinamo-Avto”nu sahibi olduğum “Pelikan” idman klubu satın alıb. Klub satılacağı halda mən ordan ayrıla bilərəm. Bakıya gəlişim isə səhhətimdə yaranan naxoşluqla bağlıdı. İdman, futbol stressli sahədi. Mənə isə bu arada həyəcanlanmaq olmaz. Ola bilsin, nəticə baxımından “Dinamo-Avto” bu gün istədiyimiz yerdə deyil. Ancaq təməl, struktur tərəfini götürəndə, planlaşdırdıqlarımızı reallaşdıra bilirik”.
Qeyd edək ki, Rəsul bəylə geniş müsahibəni “Futbol+”in növbəti sayında oxuya bilərsiz.
RƏŞAD
Digər xəbərlər
