Fərhad Vəliyev: “Ya özgüvəni həddən artıqdı, ya da risk etməyi sevir”
Keçən cümə axşamı Avroliqanın qrupunda növbəti matçına çıxan "Qarabağ" "Nant"a uduzmaqla mübarizəni məhz bu turnirdə davam etdirmək şansını çətinə saldı.
Rəqib ilk qolu Şahruddin Məhəmmədəliyevin kobud səhvindən sonra vurdu. "Köhlən atlar"ın qolkiperinin kobud səhvləri sırasına biri də əlavə olundu. Onun çıxışını dəyərləndirməsi üçün “Zirə”nin qapıçılar üzrə məşqçisi Fərhad Vəliyevlə əlaqə saxladıq:"Ümumi oyunu götürsək, Şahruddin pis çıxış etmədi. Amma qapımıza vurulan ilk qolda kobud səhvə yol verdi. Qapıçı belə səhv edirsə, ya özgüvəni həddən artıqdı, ya da risk etməyi sevir. Görünür, Şahruddinin həddən artıq soyuqqanlı olmasının nəticəsidi. "Qarabağ"ın "1 nömrə"si həmin epizodda topu oyuna daxil etməkdə çox gecikdi. Elə vəziyyətdə ya vaxtında ötürmə verməli, ya da uzaqlaşdırmalısan. Rəqibin onsuz da itiriləcək bir şeyi yox idi deyə, açıq futbol oynayaraq, qol və qollar vuracağı əvvəlcədən gözlənilirdi. Gərək Şahruddin bunları nəzərə alıb maksimum diqqətli olaydı. Bəlkə də ölkə çempionatında az şans qazanması onun formasından bir qədər uzaq düşməsiylə nəticələnib. Amma istənilən halda təcrübəli qapıçı elə kobud səhvə yol verməməlidi. Şahruddin yaxşı qapıçıdı, amma təəsaüf ki, vacib oyunlarda yersiz səhvləri üzündən qollar buraxır. İnanıram ki, nəticə çıxarıb, daha yaxşı performans göstərəcək və "Frayburq"la oyunda "Qarabağ"ın ən yaxşılarından biri kimi komandasının qrupdan çıxmasında xüsusi rol oynayacaq".
ABDULLA İSMAYILOĞLU
Digər xəbərlər
